Покистон ўзининг «Толибон» Афғонистоннинг Панжшер вилоятида назоратни қўлга киритишида иштирок этгани ҳақидаги айбловларни рад этди. Бу ҳақда мамлакат Ташқи ишлар вазирлиги вакили Асим Ифтихорга таяниб, «ТАСС» хабар берди.
ТИВ вакилининг сўзларига кўра, айрим оммавий ахборот воситалари тарқатаётган бундай баёнотлар Покистонга қарши «тарғибот кампанияси» ва халқаро ҳамжамиятни йўлдан оздириш учун «бемулоҳаза уринишлар»нинг бир қисмидир.
Ифтихорнинг таъкидлашича, Ҳиндистон оммавий ахборот воситаларининг веб-сайтларида эълон қилинган бир қатор янгиликлар аллақачон рад этилган.
Аввалроқ Ҳиндистоннинг Pioneer газетаси Покистон Ҳарбий ҳаво кучлари самолётлари ва мамлакат махсус кучлари бўлинмалари «Толибон» операциясига Панжшер вилоятини эгаллашда ҳарбий ёрдам кўрсатгани ҳақида хабар берганди.
«Толибон» ҳокимиятга келмасидан аввалроқ эса Афғонистоннинг БМТдаги доимий вакили Ғулом Исхакзай «Толибон»ни Покистон қўллаб-қувватлаётганига далиллар борлигини айтган эди. Покистон ушбу даъволарни рад этган ҳамда мамлакат «Толибон»га Афғонистонга ҳужум қилиш учун ўз ҳудудидан фойдаланиш имкониятини бермаслигини маълум қилган.
7 август куни АҚШ президенти Жо Байден журналистларга Хитой, Россия, Покистон ва Эрон «Толибон»билан музокара олиб боришга уринаётгани ҳақида айтди.
«Хитойнинг ‘Толибон’ билан ҳақиқатан муаммолари бор. Шу сабабли Хитой улар билан музокара олиб боришга ҳаракат қилаётганига ишончим комил. Покистон, Россия, Эрон ҳам шундай. Уларнинг ҳаммаси ҳозир қандай йўл тутишни аниқлашга ҳаракат қилмоқда», — деган Байден.
Изоҳ (0)