Ҳиндистон 7 майга ўтар кечаси Покистонга ҳужум қилди. Исломобод ҳам мазкур зарбаларга жавоб қайтарди. Дунё етакчилари ядро қуролига эга бўлган икки давлат ўртасидаги сўнгги ҳарбий ҳаракатларга муносабат билдирди.
Хитой Ҳиндистон ва Покистонни тинчлик ва барқарорликни биринчи ўринга қўйишга, хотиржамликни сақлашга ва вазминликка чақирмоқда.
Хитой эрта тонгда Ҳиндистоннинг ҳарбий ҳаракатларидан афсусда ва воқеаларнинг ҳозирги ривожланишидан хавотирда, дейилади Хитой Ташқи ишлар вазирлиги хабарида.
АҚШ президенти Дональд Трамп
Бу шармандалик. Ҳозиргина эшитдим. Менимча, одамлар яқин ўтмишга асосланиб, нимадир содир бўлишини кутган. Улар узоқ вақтдан бери уришиб келмоқда. Умид қиламанки, бу жуда тез якунланади, деди у.
АҚШ давлат котиби Марко Рубио
Мен Ҳиндистон ва Покистон ўртасидаги вазиятни диққат билан кузатиб боряпман. Мен бугун Трамп томонидан билдирилган фикрларни қўллаб-қувватлайман. Умид қиламанки, бу можаро тезда тугайди ва икки давлат раҳбарияти муаммони тинч йўл билан ҳал қилиш учун мулоқотни давом эттиради.
БМТ бош котиби Антониу Гутерриш:
Бош котиб Ҳиндистоннинг назорат чизиғи ва халқаро чегара орқали олиб борган ҳарбий операцияларидан жуда хавотирда. У ҳар икки мамлакатни ҳарбий жиҳатдан максимал даражада ўзини тутишга чақиради. Дунё Ҳиндистон ва Покистон ўртасидаги ҳарбий тўқнашувга дош бера олмайди.
Япония Вазирлар маҳкамаси бош котиби Есимаса Хаяши:
22 апрелда Кашмирда содир этилган террорчилик ҳаракати муносабати билан мамлакатимиз бундай террорчилик ҳаракатларини қатъиян қоралайди. Бундан ташқари, биз ушбу вазият янада кўпроқ жавоб зарбаларига олиб келиши ва кенг кўламли ҳарбий можарога айланиб кетиши мумкинлигидан жиддий хавотирдамиз. Жанубий Осиёдаги тинчлик ва барқарорлик учун Ҳиндистон ва Покистонни вазминлик кўрсатишга ва мулоқот орқали вазиятни барқарорлаштиришга қатъий чақирамиз.
Бирлашган Араб Амирликлари Ҳиндистон ва Покистонни “вазминлик кўрсатишга, кескинликни камайтиришга ва минтақавий ҳамда халқаро тинчликка таҳдид солиши мумкин бўлган янада кескинлашувга йўл қўймасликка” чақирди, дейилади БАА ташқи ишлар вазири ўринбосари шайх Абдуллоҳ бин Зоид Ол Наҳаён баёнотида. Дипломатия ва мулоқот вазиоятни тинч йўл билан ҳал қилишда самарали восита экани маълум қилинган.
Қирғизистон президенти Садир Жапаров
Шанхай ҳамкорлик ташкилотига аъзо бўлган ва биз учун дўст мамлакатлар — Ҳиндистон ва Покистон ўртасидаги кескинликнинг кучайиши боис чуқур хавотирдамиз. Томонларни имкон қадар босиқлик сақлаб, можаронинг янада авж олишига йўл қўймасликка ва тинч йўл билан ҳал этиш учун музокараларга қайтишга чақирамиз, деди у.
Президент Қирғизистон доимо барқарорлик, хавфсизлик ва халқаро ҳуқуқ нормаларига ҳурмат тарафдори бўлиб келганини маълум қилди.
Қирғизистон фуқароларини Ҳиндистон ва Покистонга боришдан тийилишга чақирмоқда
Қирғизистон Ташқи ишлар вазирлиги фуқароларини юқоридаги икки давлатга саёҳат қилишдан тийилишга чақирмоқда. Вазият нормаллашмагунча ушбу мамлакатларга бормаслик тавсия қилинган.
Покистон ёки Ҳиндистон ҳудудида бўлиб турган Қирғизистон фуқароларига ўта эҳтиёткор бўлиш ва маҳаллий ҳокимият кўрсатмаларига амал қилиш тавсия этилади, дейилади республика ТИВ хабарида.
Покистон авиация маъмурияти маълумотларига кўра, Исломобод халқаро аэропорти барча рейслар учун вақтинча ёпилган. Покистон фуқаро авиацияси бошқармаси вазият барқарорлашгандан сўнг авиақатновлар тикланишини маълум қилди.
Ҳиндистон ва Покистон бир-бирига авиазарба йўллади
Ҳиндистон расмийлари 7 майга ўтар кечаси Покистондаги, шунингдек, Кашмирнинг Покистон қисмидаги “террорчилик” инфратузилмасига ҳужум қилиб, “Синдур” операциясини бошлаганини эълон қилди. Ҳужумда фақат “террорчилик” объектлари нишонга олингани даъво қилинди. Покистон мазкур маълумотни рад этиб, зарбалар террорчиларга эмас, балки тинч аҳоли яшайдиган ҳудудларга берилганини маълум қилди.
Ҳужум оқибатида 8 киши ҳалок бўлган, 35 киши жароҳатланган. Покистон ҳаво ҳудудини 48 соатга ёпган, бош вазир Шаҳбоз Шариф ҳужумни “уруш акти” деб атаган.
Маккор душман Покистоннинг бешта нуқтасига қабиҳона зарба берди. Покистон тегишли жавоб беришга тўлиқ ҳақли ва бу тегишли жавоб аллақачон берилмоқда, деган бош вазир.
Мазкур баёнот фонида Покистон Ҳиндистонга жавоб зарбасини йўллаган. Покистон ахборот вазири Аттаулла Тарар бешта қирувчи самолёт ва битта дронни уриб туширилганини таъкидлаган.
Бундан ташқари, Ҳиндистон қуролли кучлари бригадасининг штаби ва Кашмирдаги ажратувчи чизиқ бўйлаб жойлашган ҳинд пости йўқ қилингани маълум қилинган. Ҳиндистон армияси эса бу баёнотларни тасдиқламаган.
Покистон ва Ҳиндистон муносабатлари
Икки давлат ўртасидаги муносабатлар 22 апрель куни Кашмирнинг Паҳалгам ҳудудида юз берган террорчилик ҳужуми сабаб кескинлашди. Ҳужум оқибатида 26 киши ҳалок бўлди. Қуролли шахслар маҳаллий аҳоли ва сайёҳларга қарата ўт очди. Ҳиндистон Покистонни бу ҳужумни қўллаб-қувватлашда айблади. Покистон мазкур даъвони рад этиб, текширув ўтказишни талаб қилди.
Ҳиндистон Покистон билан 1960 йилдаги Ҳинд сувлар тўғрисидаги шартномани тўхтатиб, чегара бўйлаб сув оқимини тўхтатиб қўйди. Покистон бу уруш очишга тенг эканини билдирди. Мамлакат Ҳиндистон билан дипломатик ва савдо алоқаларини чеклади, ҳаво майдонини ёпди ва савдо алоқаларини тўхтатди.
Чегара бўйлаб кичик қуролли тўқнашувлар ва ракета синовлари кўпайди. Покистон қисқа масофали Фатаҳ ракетасини синовдан ўтказди, Ҳиндистон эса хавфсизлик машғулотларини кучайтирди Халқаро ҳамжамият, жумладан Қўшма Штатлар, томонларни зиддиятни эскалация қилмасликка чақириб, дипломатик каналларни тиклашга чақирганди.
Изоҳ (0)