Uzbekistan Airways’нинг бир қатор йўналишларида фавқулодда ўзгариш бўлиши мумкин. Бу ҳақда «Дарё»нинг Uzbekistan Airways авиакомпаниясидаги манбаси хабар берди.
Фото: Uzbekistan airways
Эрон ва АҚШ ўртасидаги зиддиятли вазият ҳамда Теҳронда «Украина халқаро авиалиниялари» (МАУ)нинг Boeing 737 самолёти ҳалокатга учраганидан сўнг бир қатор авиакомпаниялар Эрон ҳаво кенгликларини айланиб ўтишини маълум қилди.
Uzbekistan Airways БААнинг Дубай ва Шаржа, Саудия Арабистонининг Жидда шаҳарларига Эрон ҳаво ҳудуди орқали парвоз қилади. Тасдиқланмаган маълумотларга кўра айнан шу йўналишларнинг учиш траекторияси ўзгариши мумкин.
«Дарё» манбасининг маълум қилишича, парвоз йўналишини ўзгартиришдан олдин учиш траекторияси ўтиши мумкин бўлган давлатлар билан музокара олиб бориш зарур.
2019 йилнинг февраль–март ойларида Ҳиндистон билан можаро туфайли Покистон ўз ҳаво ҳудудини барча транзит рейслари учун ёпганди. Ўшанда Uzbekistan Airways самолётлари Ҳиндистон (Дели, Амрицар, Мумбай), шунингдек, Жануби-Шарқий Осиё шаҳарлари (Бангкок, Куала-Лумпур, Сингапур)га бориш учун Покистон ҳаво ҳудудини айланиб ўтиб, Туркманистон ва Эрон орқали боришга мажбур бўлганди. Оқибатда парвоз вақти узайиб, йўл учун сарфланадиган ёқилғи харажати ҳам ортганди.
«Украина халқаро авиалиниялари»нинг Киевга учаётган Boeing 737 самолёти 8 январь куни, Теҳрондан ҳавога кўтарилганидан кўп ўтмай қулаган эди. Эрон самолёт двигателлардан бирининг ёниб кетиши оқибатида қулаганини таъкидлаган эди.
Аввалроқ эронлик интернет фаоли Наримон Ғариб Twitter’даги саҳифасида «Украина халқаро авиалиниялари»нинг Boeing 737 самолётига эҳтимолий ракета келиб урилиши акс этган видеони эълон қилди.
9 январь куни Канада бош вазири Жастин Трюдо, мамлакат разведкаси маълумотларига асосланиб, Украина «Боинги» Эроннинг «ер—ҳаво» таснифидаги ракетаси билан уриб туширилганини маълум қилганди. Унинг қайд этишича, бу тасодифан юз берган бўлиши мумкин.
Америка нашрларининг манбаларга асосланиб хабар беришича, лайнер «Тор» зенит-ракета мажмуасининг битта ёки иккита ракетаси билан уриб туширилган бўлиши мумкин. Авиаҳалокат юз берган оқшомда Эрон АҚШнинг Ироқдаги ҳарбий базаларига ракета зарбалари берган эди.
Изоҳ (0)