Ашхобод Афғонистон ҳукумат делегациясини Туркманистонга ташриф буюришга таклиф қилди

Туркманистон Афғонистоннинг ҳукумат делегациясини мамлакатга ташриф буюришга таклиф қилди. Бу ҳақда Туркманистон бош вазири ўринбосари, ташқи ишлар вазири Рашид Мередов бошчилигидаги делегациянинг 30—31 октябрь кунлари Кобулга амалга оширган ишчи ташрифи якунида маълум қилинган, деб хабар беради «Интерфакс».

Ташриф давомида Мередов Афғонистоннинг юқори мартабали шахслари, хусусан, Афғонистон ҳукумати раиси Муҳаммад Ҳасан Оҳунд билан учрашувлар ўтказган.

Мередов Туркманистон томони Афғонистоннинг янги давлат органлари билан конструктив мулоқот ва яқин ҳамкорликка тайёрлигини таъкидлаб, Туркманистон қўшни давлат сифатида мамлакатнинг сиёсий барқарорлиги ва хавфсизлиги, афғон халқи фаровонлиги ва бирдамлигидан чуқур манфаатдор эканини қайд этган.

Томонлар саноатнинг муҳим тармоқларидаги қўшма лойиҳаларни амалга ошириш суръатини жадаллаштиришга эътибор қаратган. Шу муносабат билан томонлар Туркманистон—Афғонистон—Покистон—Ҳиндистон газ қувурини, Туркманистон—Афғонистон—Покистон электр тармоқлари линиясини ва Туркманистондан Афғонистоннинг айрим вилоятларига темир йўлларни қуриш борасидаги ҳамкорликка тайёрлигини билдирган.

Мередов Афғонистон ташқи ишлар вазири вазифасини бажарувчи Амирхон Муттақий билан сиёсий, дипломатик ва гуманитар ҳамкорлик соҳасидаги кун тартибидаги икки томонлама устувор масалаларни муҳокама қилган. Туркманистон томони Афғонистон ҳукумати делегациясини Туркманистонга ташриф буюришга таклиф қилган.

Шунингдек, у Мулла Муҳаммад Ёқуб билан хавфсизлик масалалари бўйича учрашув ўтказган, унда Афғонистон мудофаа, ички ишлар вазирлари, миллий хавфсизлик ва чегара хизмати бошқармалари раҳбарлари иштирок этган.

Музокаралар чоғида турли вазирлик ва идоралар вакиллари чегара хавфсизлиги, инвестициялар, ўзаро савдо, энергетика, халқаро юк ташиш ҳамда транзит соҳаларидаги ҳамкорлик масалалари муҳокама қилинганди. Шунингдек, таълим ва гуманитар соҳалардаги алоқаларни ривожлантириш борасида ҳам фикр алмашилган.