Ҳиндистон ва Покистонн бир-бирини ўт очишни тўхтатиш сулҳини бузганликда айблади. Бу ҳақда Deutsche Welle хабар берди.
Маҳаллий аҳоли Кашмирда кучли портлашлар содир бўлганини маълум қилган. Ҳиндистон ташқи ишлар вазири ўринбосари Викрам Мисрийнинг айтишича, сулҳ бир неча соат давомида бир неча марта бузилган. Покистон ҳам Ҳиндистон томонидан сулҳ бузилганини таъкидлади, аммо Исломобод ўт очишни тўхтатиш режимига содиқ қолишини билдирди.
Бизнинг фикримизча, ўт очишни тўхтатиш режимига тўлиқ риоя қилиш билан боғлиқ ҳар қандай масала тегишли даражаларда мулоқот орқали ҳал қилиниши керак, дея таъкидлади Ташқи ишлар вазирлиги.
Вазирлик “жойлардаги қўшинлар ўзларини босиқ тутиши лозим”лигини қайд этди. Deutsche Welle нашрига кўра, маҳаллий аҳоли Кашмирнинг Ҳиндистон назоратидаги қисмидаги иккита йирик шаҳар — Сринагар ва Жаммуда кучли портлашлар содир бўлганини айтган.
Сулҳга нима бўлди, жин урсин? Бутун Сринагар бўйлаб портлашлар эшитилмоқда!!!, деган Жамму ва Кашмир иттифоқ ҳудуди бош вазири Умар Абдулла.
7 майга ўтар кечаси Ҳиндистон Покистонни ўққа тутди. Исломобод буни уруш ҳаракати деб атади ва зарбалар билан жавоб қайтарди. Икки томондан ҳам тинч аҳоли вакиллари ҳалок бўлгани хабар қилинди. Ҳиндистон ҳужумни “террорчиларни нишонга олгани” билан изоҳлади. Покистон эса ҳужумларда маҳаллий тинч аҳоли ҳалок бўлганини маълум қилди. 10 май куни АҚШ воситачилигида мамлакатлар ўт очишни тўхтатиш бўйича келишувга эришди.
Изоҳ (0)