Покистон ҳарбий ҳаво кучлари 7 май кунидаги жангларда Ҳиндистоннинг камида иккита самолётини Хитойдан сотиб олинган қирувчилар ёрдамида уриб туширган. Буни Reuters билан суҳбатлашган АҚШ расмийлари тасдиқлади. Бироқ Ҳиндистон вакили агентликнинг ҳолат бўйича изоҳ бериш сўровини қаноатлантирмади.
Маълум бўлишича, Покистон ҳинд самолётларига қарши Хитойнинг J-10 қирувчиларини ҳавога кўтариб, PL-15 ракеталари билан зарба берган. Оқибатда Ҳиндистоннинг камида иккита қирувчиси уриб туширилган. Улардан бири Францияда ишлаб чиқарилган Rafale бўлган. Reuters билан суҳбатлашган ҳар икки расмий ҳам АҚШда ишлаб чиқарилган F-16 самолётлари бу сафарги жангларда қатнашмаганини маълум қилди.
Деҳли қирувчи самолётлари уриб туширилгани ҳақидаги даъволарни тасдиқламади. Ҳинд расмийлари Покистон ҳудудида жойлашган “террорчилик инфратузилмаси”га қарши амалиёт муваффақиятли ўтганини таъкидламоқда.
Покистон мудофаа вазири Хавожа Муҳаммад Асиф Reuters’га интервью бериб, Ҳиндистоннинг учта Rafale самолёти J-10 қирувчиси ёрдамида уриб туширилганини маълум қилди. Исломобод, умуман олганда, бешта ҳинд самолёти сафдан чиқарилганини билдирди.
Жанговар имкониятлар синалмоқда
Покистон фойдаланаётган J-10 ва Ҳиндистон ҳарбий ҳаво кучлари сафида хизмат қилаётган Rafale самолётларининг ҳар иккаласи ҳам 4,5 авлодга мансуб бўлиб, замонавий технологияларга эга. Мудофаа саноати бўйича мутахассислар Ғарб ва Хитой намунасидаги қуролларнинг реал жангда тўқнашиши келажакдаги қуролли можаролар учун муҳим тажриба бўлишини айтмоқда. Бироқ улар якуний хулоса учун ҳозирча бир оз эрталигини ҳам қўшимча қилган.
Изоҳ (0)