Дунёдаги энг кекса аёл ҳисобланган, бразилиялик роҳиба Ина Канабарру Лукас 116 ёшида вафот этди. Бу ҳақда Ер юзининг узоқ умр кўрувчилари статистикаси билан шуғулланувчи LongeviQuest хизмати маълум қилди.
Маълумотларга кўра, Ина Канабарру Лукас 30 апрель куни Бразилиянинг жанубидаги Порто Алегри шаҳрида 116 ёш-у 326 кунлигида вафот этган.
Канабарру Лукас 1908 йил 8 июнда Жуан Антонио Лукас ва Мариана Канабарро Лукас оиласида туғилган. У 1908 йил 27 майда туғилганини таъкидлаган бўлса-да, тадқиқотлар унинг 11 кун кейинроқ туғилганини кўрсатган. Шу қадар озғинлигидан кўпчилик уни болаликдан омон қолмайди деб ўйлаган.
110 ёшида у юриш билан боғлиқ айрим қийинчиликларни бошдан кечирди ва юриш мосламаларидан фойдаланишни бошлади. 2018 йилда 110 ёшини нишонлаб, Папа Францискдан ҳаворийлик дуосини олди.
Лукас 2021 йил 25 январда 112 ёшида COVID-19 вакцинасининг биринчи дозасини олиб, эмланган энг кекса инсонлардан бирига айланди. 2022 йил октябрь ойида касалхонада бўлганида COVID-19 билан касалланди, аммо ноябрь ойида касалликдан тузалиб кетишга эришди. Бу уни ушбу касалликдан омон қолган энг кекса машҳур инсонлардан бирига айлантирди.
Ина Канабарру Лукасдан олдин 1908 йилда Осакада туғилган япониялик Томико Итоока Ернинг асосий узоқ умр кўрувчиси ҳисобланган. У ҳам 2024 йил 29 декабрь куни 116 ёшида вафот этди.
Геронтологй Research Group маълумотларига кўра, энди Этел Мей Катерхем дунёдаги энг кекса одамга айланди. У 1909 йил 21 августда Буюк Британияда туғилган ва ҳозирда Лондон жанубида яшайди, деб ёзади AFP агентлиги. 110 ёшида Катерхем COVID-19 билан касалланган, аммо тузалиб кетишга муваффақ бўлган.
Изоҳ (0)