Yaponiyaning eng keksa fuqarosi va dunyodagi eng keksa inson Tomiko Itooka 116 yoshida vafot etdi. Itooka 2019-yildan buyon yashagan Asiya shahridagi qariyalar uyi vakili Kyodo agentligiga o‘lim tabiiy sabablarga ko‘ra sodir bo‘lganini ma’lum qildi.
Tomiko Itooka 1908-yil may oyida Yaponiyaning Osaka shahrida tug‘ilgan. 20 yoshida ayol turmushga chiqqan, uning to‘rtta farzandi bo‘lgan. Tomiko Itooka 1979-yilda 71 yoshida beva qolgan, ammo faol turmush tarzini davom ettirgan va sport bilan shug‘ullangan.
Tomiko Itooka 2024-yil sentyabr oyida Yer sayyorasining eng keksa fuqarosi va dunyoda yashovchi odamlarning eng keksasi deb tan olingan. O‘sha paytda u 116 yosh-u 116 kunlik edi. Ungacha ispaniyalik Mariya Branyas Morera Yer yuzidagi eng keksa odam hisoblangan. U 2024-yil avgust oyida 117 yosh-u 169 kunligida vafot etgan.
Joriy yilning 2-yanvar kuni Vengriyada Olimpiya o‘yinlari tarixidagi eng keksa sovrindor ayol Agnesh Keleti vafot etgani haqida xabar berilgandi. 9-yanvar kuni u 104 yoshga to‘lishi kerak bo‘lgan.
Keleti 25-dekabr kuni pnevmoniya tufayli yurak yetishmovchiligi va nafas olishi qiyinlashgani uchun kasalxonaga yotqizilgan. 2-yanvar kuni ertalab vafot etgan. Marhuma sport gimnastikasi bo‘yicha besh karra Olimpiya chempioni hisoblanadi. U 1940-yilda Vengriyaning birinchi chempionatida g‘olib chiqqan. Shundan keyin kelib chiqishi yahudiy bo‘lgani uchun unga har qanday sport bilan shug‘ullanishni taqiqlashgan.
Ikkinchi jahon urushidan so‘ng Agnesh Keleti yana sport bilan shug‘ullana boshladi va 1952-yilda o‘zining birinchi Olimpiada oltin medalini qo‘lga kiritgan. U jami 10 ta Olimpiada medaliga (beshta oltin, uchta kumush va ikkita bronza) hamda uchta jahon chempionati medali (bitta oltin, kumush va bronza) sazovor bo‘lgan.
1957-yilda Keleti Isroilga ko‘chib o‘tgan, 2015-yilda esa vatani Budapesht shahriga qaytib kelgan. Sportdagi faoliyatini tugatgach, Keleti Tel-Avivda jismoniy tarbiya bo‘yicha murabbiy sifatida ishlagan, milliy terma jamoaga rahbarlik qilgan. Bundan tashqari, u gimnastika musobaqalarida hakam sifatida ham taklif etilardi.
Izoh (0)