Хитойнинг Венчжоу тиббиёт университети олимлари ичимлик танлашнинг депрессия ва хавотир ривожланиши хавфи билан боғлиқ бўлиши мумкинлигини аниқладилар. Тадқиқот натижалари Journal of Affective Disorders журналида чоп этилди.
Таҳлил 37 ёшдан 73 ёшгача бўлган 188 минг кишининг маълумотларига асосланган. Улар ўртача 11 йил давомида кузатилди ва турли хил ичимликларни истеъмол қилишнинг депрессия ва хавотирнинг янги ҳолатлари билан қандай боғлиқлиги ўрганилди.
60 ёшдан кичик одамларда ширин ичимликларни мунтазам истеъмол қилиш, газли ичимликлар ва шакарли шарбатлар ичганларда 14 фоизга, сунъий ширинлаштирувчи қўшилган ичимликларни танлаганларда эса 23 фоизга депрессия хавфини оширган. Янги мева ва сабзавот шарбатлари ёки қаҳва ичганларда эса аксинча, хавф мос равишда 19 ва 12 фоизга пастроқ бўлган.
Кекса одамларда ширин ичимликлар ва руҳий саломатлик ўртасида боғлиқлик топилмади. Аммо қаҳва ва шарбатлар ҳамон фойдали бўлиб чиқди — улар депрессия ва хавотир хавфини камайтирди.
Тадқиқотчилар бир ичимлик бошқасига алмаштирилса, нима бўлишини алоҳида ўрганишди. Шундай қилиб газли ичимликдан шарбатга ўтиш депрессия хавфини 16 фоизга камайтирди.
Олимлар таъкидлашича: уларнинг хулосалари айнан ичимликлар касаллик келтириб чиқариши ёки унинг олдини олишини исботламайди. Аммо натижалар овқатланишдаги кичик ўзгаришлар ҳам руҳий саломатликка таъсир қилиши мумкинлигини тасдиқлайди.
Изоҳ (0)