Николя Пюеш сайёрадаги энг айёр миллиардерми ёки оддий фирибгар? Hermes модалар уйи меросининг кимга тегиши масаласини кўриб чиқамиз.
Николя Пюеш ким?
82 ёшли Николя Пюеш афсонавий Терри Эрмеснинг саккизинчи авлоди ҳисобланади. 1837 йилда Терри Парижда ўзининг биринчи чарм буюмлар ишлаб чиқариш устахонасини ташкил этган бўлиб, бу кейинчалик Hermes империясига айланди. Бугунги кунда компаниянинг қиймати 230 миллиард евро (248 миллиард доллар) даражасига етди. Бренд маҳсулотлари жамиятда чинакам ҳашаматли совға сифатида қадрланади, унинг логотипи ва нақшларини эса узоқдан ҳам таниш мумкин.
Терри Эрмеснинг эвараси Николя Пюеш ўзини доимо эслатиб туради: аммо брендни ривожлантириш бўйича янги режалар билан эмас, балки бир неча йиллардан бери давом этаётган молиявий низолар туфайли. Пюеш умри давомида анча-мунча бойлик тўплашга эришган — ҳозирда у компания акцияларининг тахминан 5 фоизига эгалик қилади, уларнинг қиймати 13 миллиард долларга яқин баҳоланади. Бироқ кекса миллиардер оила қурмаган: 82 ёшли Николя ёлғиз, унинг на хотини, на фарзандлари бор. Айнан шу сабабли йилдан йилга мол-мулкни кимга мерос қолдириш масаласи тобора долзарб бўлиб бормоқда.
Пюешнинг ўғли — камтарин марокашлик боғбон
2023 йилда Николянинг миясига ғалати ғоя келади. У ўзининг боғбонини фарзандликка олишга ва унга барча мулкини қолдиришга қарор қилади. Бу ғайриоддий туюлиши мумкин, аммо бу воқеада бир нечта шубҳали жиҳатлар мавжуд.
Боғбоннинг ёши 51 эканлигидан бошлаш керак. Швейцарияда катта ёшдагиларни фарзандликка олиш камдан кам учрайдиган, бироқ мумкин бўлган амалиётдир. Бундан ташқари, марокашлик меросхўр оилали бўлиб, икки фарзанд тарбияламоқда. Ортиқча шов-шув келтириб чиқармаслик учун унинг исми матбуотдан пухта яширилади — бўлажак ота вазифани ўзи уддалаб, жаҳон ҳамжамиятини ҳайратга солади.
Маълум бўлишича, 2023 йилда Николя шов-шувли баёнотдан сўнг боғбонга Марокашдаги уйи ва Швейцариядаги вилласининг калитларини шошилинч равишда топширган.
Бироқ маълум бўлишича, Пюеш 2011 йилдаёқ ўз бойлигини хайрия ташкилотига васият қилишга ваъда берган шартномани имзолаган экан. Фарзандликка олиш билан боғлиқ “томошанинг” нега уюштирилгани ҳаммага қизиқ. Бироқ миллиардернинг ғалати хатти-ҳаракатлари шу билан тугамайди.
“Шов-шувли фирибгарлик”ми ёки эътиборни жалб қилишга уриниш?
Николяга суд жараёнлари завқ берадими, оддий қилиб айтганда, шунчаки бошқа иши йўқми ёки Hermes ворисини чиндан ҳам бойлигига ким эга чиқиши жуда ташвишга соляптими — номаълум. Аммо кейинги молиявий можаро кутилмаганда юз беради. Пюеш ўзининг молиявий бошқарувчиси Эрик Фреймондга қарши учта даъво аризаси топшириб, уни пул маблағлари билан боғлиқ фирибгарликда айблайди.
Пюеш ўз ҳисобларини бошқаришни 1998 йилда Фрейдмондга топширган бўлса-да, 21-асрнинг 20 йилларида тўсатдан 20 йилдан ортиқ вақт мобайнида ўз акциялари тақдиридан бехабар бўлганини эълон қилишга қарор қилади. Николя буни “улкан фирибгарлик” деб атади ва Фреймонд маълумотларни яширган, Hermes акцияларини қайтармаган ҳамда хайрия ҳисобларини ва бошқа инвестицияларни бошқаришда “айёрлик” қилган 20 йилни батафсил тасвирлаб беради.
Бироқ Женева суди молиявий бошқарувчини оқлайди ва Пюешнинг ўзи “кўр-кўрона ишонч” билдирганини ҳамда исталган пайтда келишувни бекор қилиш имкониятига эга бўлганини таъкидлайди.
Николя Пюеш ва Қатар қироллик оиласи
Шу кунгача Никола Пюешнинг акциялари тақдири номаълум бўлиб келаётган эди. Яқинда Қатар қироллик оиласи билан тузилган битимнинг бекор қилингани маълум бўлди. Швейцариялик миллиардер Анна Делвининг ўрнини эгаллашга интилаётганга ўхшайди.
Бутун дунё Hermes меросхўрининг маблағлари йўқолган деб ўйлаётган бир пайтда, Николя фойдали битим тузади: у ўзининг 6 фоизлик улушини Қатар амирига сотишга ваъда беради. Акциялар февраль ойида топширилиши керак эди, бироқ кутилмаганда Пюеш ваъдасини бажара олмаслигини маълум қилади.
Бунга жавобан Қатарнинг Honor America Capital компанияси янги даъво аризасини тақдим этади. Унда Пюеш ўз акцияларини сотиш шартномасини бузганликда айбланмоқда. Амир вакиллари суддан уни гаров тўлашга ва “бой берилган фойда, муқобил харажатлар ҳамда обрўга етказилган зарар” учун 1,3 миллиард АҚШ доллари тўлашга мажбурлашни сўрамоқда.
Шартнома ва шикоят хатлари шуни кўрсатадики, битим бир неча ой давомида муҳокама қилинган ва 10 февралда имзоланган. Honor America Capital вакили Швейцариядаги Никола Пюешнинг адвокатига хат йўллаб, Қатар амири Шайх Тамим бин Ҳамад Ал Соний жаноблари томонидан битимни якунлаш учун тўлиқ молиявий мажбурият олганликларини тасдиқлаган.
Hermes вориси яна бир бор ишни ўз ҳолига ташлаб қўйишга қарор қилди, бунда у акцияларнинг қаердалигини аниқлай олмаганини ва шу сабабли келажакда битимнинг “фойдасизлиги”ни баҳона қилди. Бу сафар Николянинг сувдан қуруқ чиқиши осон бўлмайди. Бироқ миллиардер бу сафар қандай ҳийла ўйлаб топишини ким билсин.
Изоҳ (0)