Исроилнинг марказий ва жанубий қисмида 30 апрель куни ўрмон ёнғинлари авж олди. Мамлакатда Мустақиллик кунига бағишланган барча тадбирлар бекор қилинди. Бу ҳақда The Jerusalem Post хабар берди.
Аҳолини эвакуация қилиш ва йўлларни ёпиш чоралари кўрилган. Исроил ёнғинларни ўчириш учун Озарбайжон, Аргентина, Буюк Британия, Греция, Испания, Италия, Кипр, Португалия, Шимолий Македония, Франция, Хорватия, Чехия ва Швециядан ёрдам сўраган. Ўт ўчириш самолётлари ва қутқарувчиларни Греция, Италия ва Хорватия юборган. Фаластин ҳам ўз ёрдамини таклиф қилгани айтилмоқда.
Ёнғинни ўчиришга 12 та самолёт, юздан ортиқ ўт ўчириш бригадалари, ҳарбий хизматчилар ва кўнгиллилар жалб қилинган. Эвакуация ишлари олиб борилмоқда ва бир қатор аҳоли пунктларини эвакуация қилишга тайёргарлик кўрилмоқда. Мамлакатнинг асосий автомобиль йўли ёпилган.
Кучли ёнғин 30 апрель куни эрталаб Қуддус тоғларидаги Мезилат-Сион аҳоли пункти яқинидаги Эштаол ўрмонида бошланган эди. Полиция ўрмонга ўт қўйилганини истисно этмаган. Шу муносабат билан уч нафар гумондор ҳибсга олинган. Ўт ўчирувчилар Байт-Шамеш ва Қуддуснинг айрим ҳудудларига яқинлашмасликни сўрамоқда.
Маълумот ўрнида, 30 апрель куни Исроил мустақиллигига 77 йил тўлди.
- Март ойида Жанубий Кореянинг жануби-шарқида мамлакат тарихидаги кенг кўламли ўрмон ёнғинлари содир бўлганди. Фожиа оқибатида 26 киши, жумладан, вертолёт учувчилари, ўт ўчирувчилар ва маҳаллий аҳоли ҳалок бўлган. Ёнғин оқибатида 4 мингдан ортиқ бинолар, жумладан, турар жой бинолари ва заводлар, тарихий обектлар ёниб кетган.
Изоҳ (0)