Россия армиясига қўшилиш эвазига таклиф этилаётган йирик бонуслар ва кучайтирилган ҳарбий тарғибот аскар ёллаш суръатини оширди. Бу ҳақда разведка маълумотлари билан танишган Америка ва Европа расмийларига таяниб, The Wall Street Journal хабар берди.
Маълумотларга кўра, ҳозирда Россия армияси ҳар ойда 30 мингга яқин аскар тўпламоқда. Бу ўтган ёзга нисбатан 5 мингга кўп. Армияга қабул қилиш кўрсаткичи ойига 40 минг кишига етиши мумкин. Бу эса Кремлга нафақат Украинадаги армия йўқотишларини тўлдириш, балки Россия ҳудудида жойлашган ва машқ қилаётган янги таркибни шакллантириш имконини беради.
Мудофаа вазирлиги билан шартнома имзолаш учун бир марталик бонусларни тўлаш Россия бюджетига кунига тахминан 2 миллиард рублга тушади, деб ҳисоблайди Молия вазирлиги маълумотлари асосида Германиянинг Халқаро хавфсизлик муаммолари институти илмий ходими Янис Клюге.
Унинг ҳисоб-китобларига кўра, умумий сумманинг тахминан тўртдан уч қисми (1,5 миллиард рубль) ҳудудий бюджетлардан қопланади. Улар Москвадан келган топшириқни бажариш учун бюджетларининг деярли 3 фоизини сарфламоқда. Қолган 0,5 миллиард рубль эса федерал бюджет ҳисобидан молиялаштирилади.
“Ёллаш машинаси” учун харажатлар 2024 йил апрель ойига нисбатан деярли 5 баравар ошди ва агар ҳозирги суръат сақланиб қолса, йил охиригача Россия ғазнасига 730 миллиард рублга тушади. Бу бутун мамлакатдаги олий таълим тизими йиллик бюджетининг (1,5 триллион рубль) ярми ва соғлиқни сақлаш бўйича миллий лойиҳага ажратилган маблағлардан (369 миллиард рубль) икки баробар кўпдир.
2024 йил Россия Мудофаа вазирлиги Украина билан урушга 440 минг кишини ёки кунига тахминан 1,2 минг кишини ёллашга муваффақ бўлди. Ўшандан бери шартнома имзолаш учун тўловлар қўшимча равишда ошди ва баъзи ҳудудларда 20 минг долларга етди. Финляндия банкининг Ривожланаётган иқтисодиётлар институти директори Ликка Корхоненнинг таъкидлашича, бу кўплаб россияликларнинг бир йиллик даромадидан юқори.
Ҳозирги йўқотишлар даражаси билан Кремль армия сонини яна 12-16 ой ушлаб тура олади. Ҳали фронтга юборилмаган эркакларнинг қисқариб бораётган демографик базаси учун “ов” охир-оқибат бюджет чекловларига олиб келади ва бу ҳукумат олдига янги сафарбарлик зарурати ҳақидаги ноқулай саволни қўяди, деб ҳисоблайди Америка урушни ўрганиш институти (ISW) нинг Россия бўйича бош эксперти Жорж Баррос.
Украинага қарши урушда 1000 дан ортиқ Ўзбекистон фуқароси жанг қилмоқда
Камида 1110 нафар Ўзбекистон фуқароси Россия Қуролли кучлари билан шартнома тузган. Бу рўйхат тўлиқ эмас: Россия ёки бошқа давлат фуқаролигига эга бўлган этник ўзбекларни ҳисобга олсак, уларнинг умумий сони бир неча мингга етиши мумкин. Бу ҳақда Украинанинг “Хочу жить” (“Яшашни истайман”) лойиҳаси маълум қилди.
Россия Қуролли Кучлари билан шартнма тузганлар орасида камида 109 киши ҳалок бўлган. Улар орасида энг ёши 21 ёшга тўлмаган, энг каттаси 62 ёшда. Ҳалок бўлганлардан бири шартнома имзолаганидан кейин 8 кун ҳам яшамаган.
Ўзбекистон фуқароларига чет давлатларининг ҳарбий хизматига ёлланиш қонунан тақиқланади!
Ўзбекистон фуқаролари чет давлатларнинг (шу жумладан, Россиянинг) ҳарбий хизматига, хавфсизлик, полиция, ҳарбий адлия органлари ёки шунга ўхшаш бошқа органларига хизматга кириш, ёллангани учун Ўзбекистон Жиноят кодексининг 154,1-моддасига кўра 3 йилдан 5 йилгача озодликни чеклаш ёки озодликдан маҳрум қилиш билан жазоланади.
Изоҳ (0)