Кекса америкалик сайёҳ халқаро аэропортларда икки марта текширувдан ўтишга муваффақ бўлган. У ўзини ҳимоя қилиш тўппончасини адашиб чамадонга солиб қўйган ва уни фақат Япониянинг Осака шаҳрига келгач, меҳмонхонада билган. Бу ҳақда NHK телеканали хабар берди.
Телеканал маълумотларига кўра, Гавайидан Японияга келган 73 ёшли америкалик Осака яқинидаги Кобе шаҳри портида круиз кемаси йўловчиси бўлишдан олдин ихтиёрий равишда полицияга таслим бўлган. Тергов материалларига кўра, сайёҳ полицияга 22 март куни Гавайи аэропортидан учиб, Кансаи халқаро аэропорти орқали Японияга етиб келганини айтган.
“Мен бу тўппончани ўзимни ҳимоя қилиш учун олиб юрардим ва бехосдан уни чамадонга солиб қўйибман. Буни фақат Осакадаги меҳмонхонага жойлашганимдан сўнг билдим” дея сайёҳнинг сўроқ пайтидаги сўзларини келтиради телеканал.
Шунингдек, америкалик тўппонча билан бирга ўқларнинг бўлиши айбини янада оғирлаштиради деб ўйлаб, ўқларни Кобе портига ташлаб юборганини айтган. Унинг юклари текширилганда, чамадонидан ҳақиқатан ҳам тўппонча топилган, порт терминалидаги ҳожатхонанинг ахлат қутисидан эса сайёҳ айтган учта ўқ чиққан.
Таъкидланишича, эркак ўқотар қуролларни назорат қилиш тўғрисидаги қонунни бузганликда гумон қилиниб, қамоққа олинган. Полиция унинг чамадонидаги тўппонча билан Гавайи ва Кансай халқаро аэропортларидаги хавфсизлик текширувларидан қандай ўта олганини аниқлашга ҳаракат қилмоқда.
Изоҳ (0)