2019 йилда дунёдаги энг кекса аёл сифатида тан олинган япониялик Кане Танака 19 апрель куни 120 ёшида вафот этди. Бу ҳақда NHK телеканали хабар берди.
Кане Танака 1903 йилда рус—япон уруши вақтида Кумакичи ва Кума Ота оиласида туғилган. Оиланинг Канега қадар олти нафар фарзанди бўлган. У иккита жаҳон урушидан омон чиққан ва бешта император бошқарувини кўрган, хусусан, ислоҳотчи император Мейдзидан тортиб амалдаги Нарухитогача.
Кане Танака 19 ёшида Хидео Танакага турмушга чиққан ва оиланинг тўрт нафар фарзанди бўлган, шунингдек, улар бир нафар болани асраб олган. Хидео гуруч, япон ширинликлари ва удон лапшасини ишлаб чиқарувчи оилавий бизнесни бошқарган. Аёлнинг эри ва тўнғич ўғли Иккинчи жаҳон урушида қатнашган, Nobuо исмли фарзанди эса СССРда асирга олиниб, 1947 йилда Японияга қайтган.
Кане турмуш ўртоғини армияга олиб кетишгач, оилавий бизнес билан шуғулланишни бошлаган ва 103 ёшига қадар дўконлар бошқарувида иштирок этган.
2019 йилнинг мартида Кане Танака сайёрадаги энг кекса аёл сифатида Гиннеснинг рекордлар китобига киритилган эди. У ҳатто Японияда умр кўриш давомийлиги бўйича рекорд ўрнатган.
Сўнгги йилларда Танака Фукуока префектурасидаги қариялар уйида яшаб келган ва январь ойида 119 ёшини нишонлаган. NHK’нинг таъкидлашича, аёл 120 ёшгача яшашни хоҳлаши ҳақида гапирган.
Бундан олдин япониялик 107 ёшли опа-сингиллар Гиннеснинг рекордлар китобидан дунёдаги энг кекса эгизаклар сифатида ўрин олгани, сайёранинг энг кекса аёли узоқ умр кўриш бўйича рекорд ўрнатгани тўғрисида хабар берилганди.
Изоҳ (0)