АҚШнинг собиқ президенти Жо Байден лавозимини тарк этганидан кейин илк бор Иллинойс штатининг Чикаго шаҳрида оммавий нутқ сўзлади. Оқ уйнинг собиқ раҳбари Дональд Трампнинг янги маъмурияти сиёсатини кескин танқид қилган. Мурожаатни Американинг АBC телеканали эфирга узатди.
Байден ногиронлиги бўлган инсонларга ҳуқуқий ёрдам кўрсатувчи АCRD ноҳукумат ташкилотининг конференциясида иштирок этган. У тахминан 30 дақиқа нутқ сўзлаган ва ҳозирги АҚШ раҳбари Дональд Трамп исмини бир марта ҳам тилга олмасдан унинг маъмуриятининг ижтимоий таъминот соҳасидаги сиёсатини танқид қилган.
“Улар Ижтимоий таъминот бошқармасига болта ўқталиб, 7000 нафар ходимни эшикдан ҳайдаб чиқаришди. Тарихда биринчи ва ягона марта ижтимоий нафақалар кечиктирилиши ёки тўхтатилиши мумкин”, дейди демократ АҚШнинг ногиронлик нафақалари ва пенсияларни тўлайдиган миллий агентлиги SSА’ни назарда тутиб.
“Ижтимоий таъминот давлат дастуридан ҳам кўпроқ нарса. Бу биз миллат сифатида берган муқаддас ваъдамиз”, деди собиқ президент.
У Трамп маъмурияти амалга ошираётган давлат харажатларини қисқартиришга қарши чиқди ва бу камбағал фуқароларга зарба беришини айтди.
“Оиласида миллиардер бўлмаган, бутунлай ёлғиз яшайдиган 94 ёшли кекса она ҳақида нима дейиш мумкин?”, деди Жо Байден.
Бундан ташқари, собиқ президент тингловчилар эътиборини Америка жамиятининг бўлинишига қаратган ва бундай ҳолат давом этиши мумкин эмаслигини огоҳлантирган.
“100 кундан камроқ вақт ичида бу маъмурият шунчалик кўп зарар ва вайронагарчилик келтирдики, буларнинг барчаси шунчалик тез содир бўлиши мумкинлиги ҳайратланарли. Биз ҳеч қачон бунчалик бўлинмаган эдик”, деди Байден.
Таъкидланишича, 82 ёшли сиёсатчи бўғиқ овозда гапирган ва вақти-вақти билан дудуқланиб қолган.
Эслатиб ўтамиз, 20 январь куни 82 ёшли Байден Оқ уйни Трампга топширди. У 2021 йилдан 2025 йилгача давлат раҳбари лавозимини эгаллаган.
Дональд Трамп Байденни Украинадаги можарони келтириб чиқаришда, шунингдек, АҚШ ва Россия муносабатларининг бу қадар издан чиқишида айблаганди. Март ойида эса Жо Байденнинг фарзандларини давлат қўриқчиларидан маҳрум қилганди.
Изоҳ (0)