Украина президенти Владимир Зеленский Россия билан ҳар қандай форматдаги музокараларга тайёрлигини айтди. Сиёсатчи мамлакатга зарба беришни тўхтатишга чақирди.
Зеленский 30 апрель куни Украина ҳамкорлари билан кўплаб техник, биринчи навбатда дипломатик ишларни амалга оширганини айтди.
Яқин кунларда бўлиб ўтадиган учрашувлар ва музокараларга тайёргарлик кўряпмиз. Хавфсизлик — асосий устувор йўналиш, деди у.
Сиёсатчи Люксембург ташқи ишлар ва мудофаа вазирлари билан суҳбатлашганини айтган. Музокараларда Европадаги давлатларнинг ўзаро ҳамкорлиги ва Украинани қўллаб-қувватлаш муҳокама қилинган. Томонлар ўт очишни камида 30 кунга тўхтатиш зарурлигини маълум қилган.
Зарбаларни тўхтатиш, қотилликларни тўхтатиш ва шундан сўнг музокаралар столида ечим излаш керак. Биз суҳбатнинг ҳар қандай форматига тайёрмиз. Россия зарбалар ва урушни тўхтатиши керак, деган президент.
29 апрель куни Зеленский зудлик билан 30 кунлик сулҳ таклиф қилган эди. Украина Ташқи ишлар вазирлиги исталган санадан бошланиши мумкин бўлган 30 кунлик ўт очишни тўхтатиш режимини қўллаб-қувватлашини билдирган.
Россия президенти матбуот котиби Дмитрий Песков эса бу масалада нюансларни ҳисобга олиш муҳимлигини таъкидлаган. Бундан аввалроқ Россия етакчиси Владимир Путин Ғалабанинг 80 йиллиги муносабати билан уч кунлик вақтинчалик сулҳ эълон қилган эди. У 7 майдан 8 майга ўтар кечаси соат 00:00 дан 10 майдан 11 майга ўтар кечаси соат 00:00 гача амал қилади. Зеленский мазкур сулҳни рад этган ва буни “манипуляция” деб атаган.
Изоҳ (0)