Жонс Ҳопкинс университети маълумотларига кўра, дунёда коронавирус билан касалланганлар сони 133 195 909 кишига етди, шуларнинг 2 889 746 нафари вафот этди. COVID-беморлар сони бўйича биринчи бешликдан АҚШ (30,9 миллион киши), Бразилия (13,1 миллион), Ҳиндистон (12,9 миллион), Франция (4,9 миллион) ва Россия (4,5 миллион) ўрин олган.
Колумбияда 104 ёшли аёл икки марта COVID-19’га чалиниб, икки марта ҳам уни енгишга муваффақ бўлди. Кармен Эрнандес биринчи марта ўтган йилнинг июнида коронавирусдан соғайган эди. Ўшанда бемор ўзи 25 йилдан буён яшаётган қариялар уйида бошқа беморлар билан яккалаб қўйилган эди. Шу йилнинг 27 февралида Эрнандес коронавирусга қарши эмланган бўлса-да, 8 март куни унда вирус аниқланди. Шифокорлар айтишича, бундай қисқа муддатда иммунитет шаклланишга улгурмаган.
Аёл 19 март куни касалхонага ётқизилди. Интенсив даволаш бўлимида у сунъий нафас олдириш аппаратига эҳтиёж сезмаган ҳолда мустақил нафас ололди. 5 апрель куни Эрнандес шифокорлар олқишлари остида касалхонадан чиқди ва қариялар уйига қайтди. У Колумбияда коронавирусдан соғайган энг кекса одамга айланди.
Қозоғистонда ўтган бир кеча-кундузда (7 апрель ҳолатига) 2586 кишида коронавирус аниқланди. Бу рекорд кўрсаткич деб баҳоланди. Бир кун аввал 2080 киши касалликка чалинган эди. Шу тариқа, мамлакатда коронавирус юқтириш ҳолатлари жами 261 503 тага етди. Энг кўп беморлар Олмаота (710 киши) ва Нур-Султон (578) шаҳарларида ҳамда Олмаота вилоятида (325) қайд этилди.
Токио маъмурлари Япония ҳукуматидан COVID-19 тарқалишига қарши курашиш учун фавқулодда чеклов чораларини киритиш учун рухсат сўради.
Япония пойтахтида фавқулодда вазият режими январда бекор қилинган эди. Губернатор Юрико Коикенинг сўзларига кўра, «Токионинг Осакадагидек вазият билан тўқнаш келиши вақт масаласи, холос». Осакада яқинда касалланишнинг юқори даражаси туфайли фавқулодда ҳолат эълон қилинган ва Олимпиада машъали эстафетасини ушбу префектурада томошабинларсиз ўтказишга қарор қилинган эди. Коикенинг айтишича, 9 апрель куни янги чораларнинг тафсилотлари муҳокама қилиниши мумкин.
Японияда коронавирус билан касалланиш даражасининг ўсишга мойиллиги кузатилмоқда. Ўтган бир кеча-кундузда 3,4 минг кишида вирус аниқланган, бутун пандемия даврида касалланганлар сони 494 мингга етган.
Литвада ҳам янги касалланиш ҳолатлари сони ўсмоқда. Мамлакат яқин ҳафталар ичида «қора ҳудуд»га кириб қолиши мумкин, деб маълум қилди соғлиқни сақлаш вазири Арунас Дулкис. «Қора ҳудуд» — 14 кун мобайнида янги касалланиш ҳолатлари ҳар 100 минг аҳолига 500 тадан ошганда юзага келадиган вазиятдир. Айни вақтда мусбат тестлар улуши 10 фоиздан ошиши керак.
Литвада ўтган икки ҳафтада касалланиш даражаси ҳар 100 минг аҳолига 382,3 тани ташкил қилган. Мусбат жавобли тестлар улуши бир ҳафтада 7,5 фоизга етган. Энг жиддий вазият Вилнюсда кузатилмоқда. Бу ерда касалхонага ётқизилганлар сони бир ҳафтада 30 фоизга ошган. Шунингдек, Каунас шаҳрида ҳам вазият ёмонлашишни бошлаган.
Буюк Британияда AstraZeneca вакцинаси билан эмлангандан кейин тромблар ҳосил бўлиши билан боғлиқ 79 та ҳолат аниқланди, шуларнинг 19 таси беморларнинг ўлими билан тугади. Марҳумларнинг 11 нафари 50 ёшдан кичик бўлган, яна уч киши 30 ёшга ҳам тўлмаган бўлган.
Вакцинациядан кейин тромбоз ҳосил бўлган 79 кишининг барчаси AstraZeneca дорисининг биринчи дозасини олган, холос.
Буюк Британия Англия-Швеция вакцинасининг энг йирик харидори бўлиб, у Евроиттифоққа экспорт қилинган 42 миллион дозанинг 10 миллионтасини захира қилиб қўйган.
Изоҳ (0)