Туркия мухолифатидаги Республика Халқ партиясининг праймеризида 15 миллион киши иштирок этди ва ҳибсга олинган ҳамда лавозимидан четлатилган Истанбул шаҳри мэри Акрам Имомўғлига овоз берди. Бу ҳақда So‘zcü нашри хабар берди.
-I4estNZa.avif)
Имомўғли тарафдорлари 23 март куни бўлиб ўтган праймеризда овоз бериб, Акрам Имомўғлини Туркиянинг энг кекса сиёсий партияси — Республика Халқ партиясидан президентликка номзод этиб расман сайлади.
23 март куни мамлакатимизнинг келажакдаги президенти Акрам Имамўғли учун партиямизнинг 1 миллион 653 минг аъзоси овоз берди. Бу ҳозирги давлат тўнтаришига уринишга энг қатъий жавобдир. Бундан ташқари, фуқароларни бирдамлик қутиларимизга келиб овоз беришга таклиф этдик. Улар Акрам учун 13 миллион 210 минг овоз берди. У учун жами 14 миллион 850 мингдан ортиқ киши овоз берди, дея таъкидлади партия раҳбари Ўзгур Ўзел.
У президент Ражаб Тоййиб Эрдўғонни муддатидан олдин президентлик сайловини ўтказиш тўғрисида қарор қабул қилишга ва унда Имомўғли билан курашишга чақирди.
Праймеризда овоз бериш натижалари эълон қилинганидан сўнг, Акрам Имомўғли Силиври қамоқхонасидаги илк постини эълон қилди.
Силиври қамоқхонасидан сизлар билан баҳам кўрмоқчи бўлган, мени жуда қувонтирган янгиликлар бор. Республика халқ партиямизнинг дастлабки президентлик сайловларида рекорд даражадаги иштирок қайд этилди. 15 миллион фуқаромиз овоз берди. Мамлакатимизда ҳукумат зулми, вайрон бўлган иқтисодиёт, лаёқатсизлик ва қонунсизликдан азият чекаётган ўн миллионлаб одамлар сайлов қутилари олдига келди, дея ёзди у.
Шу билан бирга, Истанбулда ва Туркиянинг бошқа шаҳарларида Акрам Имамўғлининг ҳибсга олинишига қарши норозилик намойишлари бешинчи суткадан бери давом этмоқда. Истанбул мэрини қўллаб-қувватлаш учун 23 март куни ярим миллионга яқин фуқаро кўчаларга чиққан. Полиция билан тўқнашувлар юз берган.
Шу билан бирга, сиёсий инқироз мамлакат иқтисодиётига салбий таъсир кўрсатмоқда. Уч кун ичида Истанбул фонд биржасининг BIST 100 индекси 16 фоиздан ортиққа қулаб тушди. Баъзи турк оммавий ахборот воситалари хабар беришича, ҳукумат миллий валютани барқарорлаштириш учун миллиардлаб доллар сарфлашга мажбур бўлмоқда.
Биз бозорларнинг соғлом фаолият юритиши учун барча зарур чораларни кўришда давом этамиз. Илтимос, ёлғон хабарларга ишонманг, деган Туркия молия вазири Меҳмет Шимшек ушбу маълумотга муносабат билдириб.
Имомўғли бўлажак президентлик сайловларида Ражаб Тоййиб Эрдўғоннинг асосий рақиби бўлиши кутилаётган эди. У 19 март куни коррупция ва террорчи ташкилотларни молиялаштириш айби билан қўлга олинди. Истанбул университети мэрнинг дипломини бекор қилди. Имомўғлининг олий маълумоти йўқлиги президентликка расман номзод бўлишга имкон бермайди.
23 март куни суд коррупцияда гумон қилинаётган Акрам Имомўғлини ҳибсга олиш тўғрисида қарор чиқарди. Иккинчи террорчилик иши бўйича тергов доирасида ҳибсга олиш тўғрисидаги сўров рад этилди. Имомўғли билан бирга мэриянинг бир қатор юқори лавозимли амалдорлари ҳибсга олинган, жами 90 дан ортиқ киши суд жараёнидан ўтмоқда. Бундан ташқари Истанбул мэри вақтинчалик лавозимидан четлатилган.
Изоҳ (0)