AQSHda 5-aprel kuni mamlakat prezidenti Donald Trampning siyosatiga qarshi ommaviy norozilik namoyishlari bo‘lib o‘tdi. Bu haqda CNN xabar berdi.
“Qo‘lingni tort” deb nomlangan kampaniya 50 shtatni qamrab oldi va Tramp inauguratsiyasidan beri eng yirigi bo‘ldi. AQSHda jami 1400 ta aksiya bo‘lib o‘tdi. Ularning eng yiriklari Nyu-York, Chikago, Boston, Los-Anjeles va Vashingtonda kuzatildi. Tashkilotchilar ma’lumotlariga ko‘ra, 600 mingga yaqin odam namoyishlarda ishtirok etish niyatini tasdiqlagan. Ammo ko‘chaga chiqqanlarning aniq sonini hisoblash imkonsiz.
Faollar “korrupsiyaga va milliarderlarning hokimiyatni qo‘lga olishiga barham berish”ni talab qilib, Ilon Maskning vakolatlari va harakatlaridan, xususan, davlat xizmatchilarini ommaviy ishdan bo‘shatishidan norozilik bildirgan. Shuningdek, ular ijtimoiy dasturlarni moliyalashtirishni qisqartirishga qarshi chiqqan hamda muhojirlar, transgenderlar va boshqa himoyasiz jamiyat a’zolariga nisbatan bo‘layotgan hujumlarni qattiq qoralagan.
Biz milliy inqirozga duch keldik. Tramp va Mask hokimiyatni g‘ayriqonuniy ravishda egallab olayotgan bir paytda, demokratiyamiz, turmush tarzimiz va huquqlarimiz xavf ostida qolmoqda. Bu shunchaki korrupsiya emas. Bu oddiy boshboshdoqlik ham emas. Bu dushmanona egallab olishdir, deya ta’kidladi tashkilotchilar.
Trampga impichment e’lon qilishmoqchi
O‘z navbatida, kongressmen-demokrat El Grin Vashingtondagi mitingda 30 kun ichida Trampga impichment e’lon qilish to‘g‘risida da’vo arizasi kiritishini, chunki u AQSH prezidentining ishonchi va lavozimiga “loyiq emas”ligini aytdi.
Norozilik namoyishlaridan bir kun oldin sobiq prezident Barak Obama va respublikachining saylovdagi raqibi Kamala Xarris Trampni ochiqchasiga tanqid qildi. Odamlar nafaqat AQSHda, balki Kanada, Meksika, Germaniya, Fransiya va Buyuk Britaniyada ham Tramp boshlagan savdo urushidan norozi bo‘lib namoyishga chiqdi.
Trampning savdo siyosati
2-aprel kuni AQSH rahbari dunyo tovarlariga bojlar joriy qildi. O‘zbekiston mahsulotlariga ham 10 foizlik boj solinmoqda. Ba’zi mamlakatlarga nisbatan bojlar miqdori esa 50 foizga yetgan.
Bu AQSHning harakatlari jahon iqtisodiyoti sekinlashishiga sabab bo‘lishi mumkinligi haqidagi xavotirlarni keltirib chiqardi. Natijada, investorlar xavfsiz hisoblangan aktivlarga, jumladan, oltinga yo‘nalishdi. Bu esa qimmatbaho metall narxining ko‘tarilishiga olib keldi. 3-aprel kuni tarixda ilk bor oltin narxi bir unsiya uchun 3200 dollardan oshdi. Xitoy bojlarga javoban Amerika tovarlariga 34 foizlik tariflar belgiladi.
Izoh (0)