АҚШ президенти Дональд Трамп Оқ уй маслаҳатчиси Алисса Фарах-Гриффин билан 2020 йилги президент сайлови натижалари эълон қилинишидан аввалроқ бўлган шахсий суҳбат чоғида ўз мағлубиятини тан олган. Бу ҳақда мансабдор аёл CNN телеканали эфирида маълум қилди, деб ёзади «РБК».
«У телевизор орқали Жо Байденни кўрганида: ‘Шу одамга ютқизиб қўйганимга ишона оласизми?’ — деб ўринсиз гапириб қўйганди. Аслида у матбуот анжумани чоғида коронавирус ҳақида гапираётганида ҳам буни тан олганди… у Жо Байден ютди, деб гапириб юборганди», — деб эслади Фарах-Гриффин.
АҚШ президенти сайловлари 2020 йил ноябрида бўлиб ўтганди. Трамп Республикачилар партиясидан қайта сайланиш учун ўз номзодини қўйганди, унинг рақиби демократ Жо Байден эди. Дастлабки ҳисоб-китоблар Байденнинг ғалабасини кўрсатди. Декабрда бу натижани сайловчилар коллегияси ҳам тасдиқлади. Трамп эса ўз мағлубиятини тан олмади ва натижалар қалбакилаштирилганини даъво қилди, бироқ ноябрь охирида унинг маъмурияти ҳокимиятни топшириш жараёнини бошлашга тайёрлигини маълум қилди.
15 ноябрь куни Трамп Twitter’да «у (Байден) ғолиб бўлди, чунки сайловлар қалбакилаштирилган эди», деб ёзди, лекин кўп ўтмай, у «қалбаки ОАВлар кўз олдида»ги ғалабани назарда тутганини аниқлаштирди. «Мен ҳеч нарсани тан олмайман!» — дея аниқлик киритди у.
Демократнинг ғалабаси 2021 йил 6 январда конгресс сессиясида расман тасдиқланиши керак эди, аммо шу куни Трампнинг тарафдорлари уни қўллаб-қувватлаб митинг уюштирди. Акция тартибсизликларга айланиб кетди, намойишчилар Капитолийга бостириб кирди. Сессия тўхтатилди, бино эвакуация қилинди, тартибсизликлар оқибатида беш киши ҳалок бўлди.
Шундан кейин Байден ва бошқа демократлар Трампни зўравонликка даъват қилишда айблади. Давлат раҳбарининг Twitter ва бошқа ижтимоий тармоқлардаги аккаунтлари блокланди. Трампга қарши импичмент жараёни ташкиллаштирилди, бироқ сенатда бўлиб ўтган овоз беришда у оқланди.
2021 йил 20 январь куни Байден АҚШ президенти лавозимига киришди.
Изоҳ (0)