AQSh Senati Donald Trampni impichment ishi bo‘yicha oqladi

AQSh Senati sobiq prezident Donald Trampning impichmentiga qarshi ovoz berdi, deya xabar qiladi “RBK”. Jarayon CNBC telekanali va Amerikaning boshqa OAVlari orqali translyatsiya qilindi.

Sobiq davlat rahbariga nisbatan qo‘zg‘alonga da’vat qilganlik ayblovini yoqlab Kongress yuqori palatasining 57 nafar a’zosi ovoz berdi. 43 senator qarshi chiqdi. Impichmentni tasdiqlash uchun kamida 67 kishi yoqlab ovoz berishi kerak edi.

Trampga nisbatan impichmentni ko‘rib chiqish 9-fevral, seshanba kuni boshlandi. 13-fevral kuni kechqurun himoya va ayblov tomonlari jarayonni cho‘zmaslik uchun guvohlarni so‘roq qilmaslikka qaror qildi. Yakuniy dalillar uchun tomonlarga ajratilgan to‘rt soatdan ikki soatga yaqini kerak bo‘ldi.

Bungacha Demokratik partiyadan senatorlar guvohlarni chaqirishni taklif qildi, ammo bu Tramp himoyasining salbiy munosabatiga sabab bo‘ldi va ular ham o‘z guvohlarini chaqirishni talab qildi. Buning o‘rniga ishga kongressvumen Jeymi Xerrera Batler va ismlari oshkor qilinmagan shaxslarning yozma arizalarini aralashtirishdi.

Trampning o‘zi jarayonda qatnashib, ko‘rsatma berishdan bosh tortdi. Sobiq prezidentni ayblovchilar bu Oq uy sobiq rahbarining aybdorligi foydasiga hisoblanishini ma’lum qildi. Uning himoyasi impichmentni konstitutsiyaga zid deb atadi, chunki Tramp davlat lavozimini ortiq egallab turgani yo‘q.

Agar Tramp aybdor deb topilganida, u boshqa hech qachon prezident lavozimiga da’vogarlik qila olmagan bo‘lardi.

6-yanvar kuni prezident saylovi natijalaridan norozi bo‘lgan Tramp tarafdorlari Vashingtonda uni qo‘llab-quvvatlab miting o‘tkazgach, Kapitoliy binosiga shiddatli hujum uyushtirdi. Oqibatda binoga zarar yetkazildi, besh kishi halok bo‘ldi (ular orasida bir politsiyachi bor), kamida 60 kishi jabrlandi.

Shundan keyin Amerika Kongressi a’zolari, shu jumladan, bir nechta respublikachilar ham Trampni tartibsizliklarga da’vat qilishda ayblab, unga impichment e’lon qilishga chaqirdi. U AQSh tarixida ikki marta impichment e’lon qilingan birinchi prezident bo‘ldi.

Trampga nisbatan birinchi impichmentga AQSh Vakillar palatasi spikeri Nensi Pelosi 2019-yil sentabrda tashabbuskorlik qilgan. Unga Trampning Ukraina prezidenti Vladimir Zelenskiy bilan muzokaralari e’lon qilinishi sabab bo‘lgan. Amerika yetakchisi Kiyevni Trampning 2020-yilgi saylovlardagi bosh raqibi, yakunda esa 46-AQSh prezidentiga aylangan Jo Baydenning o‘g‘li — Xanter Baydenning faoliyatini tekshirishni boshlashga og‘dirmoqchi bo‘lgan.

Demokratlar partiyasi yetakchilari aytishicha, Tramp Zelenskiyga bosim o‘tkazish uchun o‘z imkoniyatidan (Ukrainaga harbiy yordamni to‘xtatib qo‘yish) foydalangan. Impichment hokimiyatni suiiste’mol qilish va Kongress tekshiruviga to‘sqinlik qilish haqidagi ikkita modda bo‘yicha e’lon qilingan. Tramp bu ayblovlarni rad etgan. 2020-yil fevralida Senat uni ikkala modda bo‘yicha ham oqlagan.