Январь ойида Оқ уйни тарк этган АҚШнинг 45-президенти Дональд Трамп Шимолий Каролина штатидаги Гринвилл шаҳрида штат республикачилар анжуманида нутқ сўзлади, деб ёзади Reuters.
Хабарга кўра, 90 дақиқалик нутқ давомида Трамп, хусусан, Хитой ҳукумати коронавирус пандемиясидан етказилган зарар учун АҚШга ва бутун дунёга «камида 10 триллион доллар» тўлаши кераклигини айтди. Шунингдек, у барча мамлакатларга Хитойга қарзларини тўлашдан бош тортишни таклиф қилди.
Трамп, шунингдек, 2022 йилги Конгресс сайловларида Республикачилар партиясига ёрдам беришга тайёрлигини айтди. Шунингдек, у 2024 йилда бўлиб ўтадиган президентлик кампаниясида қатнашмоқчи эканига яна бир бор ишора қилиб, ўша йилни интизорлик билан кутаётганини таъкидлади.
Дональд Трамп 2020 йилги сайловда ғалаба қозонган АҚШ президенти Жо Байден маъмуриятини танқид қилди. Хусусан, у Байден маъмуриятини «тарихдаги энг радикал сўллар маъмурияти» деб атади. Трамп АҚШнинг амалдаги президентини «Шимолий оқим 2» газ қувури қурилишига қарши санкциялар киритмасдан, лойиҳани қўллаб-қувватлашда айблади.
Бундан ташқари, Трамп Хитой расмийлари ва Россия президенти Владимир Путин Байденни «очиқдан очиқ мазах қилаётганини» айтди.
Трампнинг Шимолий Каролинада сўзлаган нутқи унинг февраль ойи охиридан буён биринчи оммавий чиқиши бўлди. Америка ОАВлари сиёсатчининг нутқи унинг 2020 йилги сайловолди нутқларига ўхшашлигини таъкидлади, аммо Associated Press ёзишича, Трамп анжуманда атиги 1200 кишининг ёнида сўзлаган. Яна ўн минглаб одамлар унинг чиқишини интернет орқали кузатиб турган.
Маълумот учун, Дональд Трамп 2017 йилдан 2021 йилгача АҚШ президенти бўлган. У фаолияти давомида икки маротаба импичмент эълон қилинган илк президентга айланган: 2019 йилда Вакиллар палатаси уни ваколатини суиистеъмол қилишда ва АҚШ Конгрессининг ишига аралашишда, 2021 йилда эса қўзғолонга даъват қилганликда айблаган. Сенат иккала айблов бўйича ҳам Трампни оқлаган.
Аввалроқ Нью-Йоркда Трампнинг компаниясига нисбатан жиноий суриштирув бошлангани, Twitter Трампнинг баёнотларини чиқариш учун очилган аккаунтларни блоклагани, Трамп тарафдорлари билан мулоқот қилиш учун donaldjtrump.com сайтини ишга туширгани ҳақида хабар берилганди.
Изоҳ (0)