Руҳий саломатлик ва ички хотиржамликни афзал кўриб офлайн ҳаётни танлаган юлдузлар

Ҳамма машҳурлар ҳам ўзларининг ижтимоий тармоқларини юритмайди, чунки уларнинг ҳар бир сўзи ва сурати миллионлаб одамлар томонидан муҳокама қилинади. Бу материалнинг қаҳрамонлари онлайн ҳаётдан воз кечишди. Нега улар бундай қилди ва буни қилишга қандай муваффақ бўлишди, бу ҳақда билиб оласиз.

Ижтимоий тармоқлар ҳар кунги ҳаётимизнинг бир қисмига айланиб қолди, масалан, транспортда кета туриб лентани кўриб чиқамиз, нонушта пайтида сторисларни баҳам кўрамиз ва юлдузларни кузатамиз, гўёки улар бизнинг танишларимиздек. Аммо машҳурларнинг ўзлари учун бундай очиқлик босим, ҳейт ва чарчоққа айланади. Кимдир танаффус олади, кимдир аккаунтларни жамоасига топширади, кимдир эса умуман ижтимоий тармоқда ўз саҳифаларини очмайди. Офлайн ҳаётни танлаган ва бунинг муҳимлигини тушунтирган юлдузларнинг ҳикоялари билан танишинг.

Селена Гомес: руҳий саломатлик лайклардан муҳимроқ

Биттагина ижтимоий тармоқнинг ўзида Селена Гомесга 421 миллион киши обуна бўлган. Шунга қарамай, юлдуз кўпинча саҳифаларни юритишни рад этишини гапиради. 2023 йилнинг ноябрь ойида Селена бу қарорини дунёда содир бўлаётган даҳшатли воқеалар ҳақидаги хабарлар унинг руҳиятига салбий таъсир кўрсатаётгани билан изоҳлади. Бошқа бир сафар эса хонанда ижтимоий тармоқлар иловасини телефонидан ўчириб ташлаганини ва бундан кейин уни жамоа аъзолари юритишини айтди. Бу каби баёнотларга мухлислар аллақачон ўрганиб қолишган ва уларни унчалик жиддий қабул қилишмайди.

Гомес ижтимоий тармоқлар унинг ҳолатига салбий таъсир кўрсатишини тан олди: хавотирлиликни кучайтиради, ўз-ўзига бўлган ишончга зарар етказади ва ҳақиқат ҳиссини йўқотади. Тармоқлардан танаффуслар эса (гарчи одатда узоқ бўлмаса-да) унинг психик саломатлигини ҳимоя қилишнинг бир усулидир.

“Мен ўз ижтимоий тармоқларимда ноадекват фойдаланувчилар, ҳейтерлар, ғазабли шарҳлар ва ҳақоратлар билан курашишга мажбур бўлдим. Бу каби нарсаларни эътиборсиз қолдириш қийин. Ўзимни ҳурмат қилиш ва дунёқарашимга путур етмаслиги учун мен камроқ постлар жойлаштира бошладим. Ҳаммага шундай қилишни маслаҳат бераман”, деб тан олади хонанда. Селена ҳар сафар тармоққа қайтиб келганида лайклардан кўра унинг руҳий саломатлиги муҳимлигини эслатади.

Белла Ҳадид: даволаниш учун ижтимоий тармоқлардан 100 кунга воз кечди

2023 йилда дунёдаги энг машҳур моделлардан бири Белла Ҳадид ижтимоий тармоқлардан йўқолди. Унинг мухлислари дарҳол хавотирга тушишди. Улардан бири ҳатто унинг отаси, америкалик миллиардер Муҳаммад Ҳадид билан боғланишга муваффақ бўлди. Саволларга жавобан моделнинг отаси Белла билан ҳаммаси яхши экани ва хавотирланишга ҳожат йўқлигини айтди. Мурожаатнинг скриншоти дарҳол тармоқда тарқалди.

Аммо у кўргазмаларда ҳам пайдо бўлмади, Мет Гала ва Канн кинофестивалини ҳам ўтказиб юборди. Кейинроқ Белла ўзининг ғойиб бўлиши сабабини тушунтирди: у Лайм касаллигига чалиниб 100 кунлик даволаниш курсини бошидан кечирганини айтди. Бу касаллик қўнғиз чақиши орқали юқадиган юқумли касаллик бўлиб, кучли чарчоқ, танада оғриқ, тери муаммолари ва ҳатто психоэмоционал бузилишларга олиб келади. Бундай пайтда ижтимоий тармоқлар қўшимча стрессга айланади.

Деярли юз кун давомида у камералар ва гаджетлардан йироқда бўлиб, соғлиғига жиддий эътибор қаратди: “Менда ҳаммаси яхши, хавотирланишга ҳожат йўқ. Мен ҳеч нарсани ўзгартирмасдим. Агар мен бу ерга, ҳозирги вақтга, ҳаммангиз билан бирга бўлган бу лаҳзага етиш учун яна шу йўлдан ўтишим керак бўлса, мен буни яна қилардим”.

Ҳозир Белла яна фаол, аммо у аввалгидек эътибор учун курашмайди — соғлик ва ички хотиржамлик у учун муҳим.

Эд Ширан: 8 йилга ижтимоий тармоқлардан воз кечди

Эд ижтимоий тармоқлардан воз кечиш ғояси 2015 йилда унинг хаёлига келганини айтади. Ўшанда хонанда уларга қанча вақт сарфлаётганини англади. Бундан ташқари, уни айбдорлик ҳисси қийнади, чунки унга ёзаётган ҳаммага жавоб бера олмаётган эди.

“15 ёшимдан бери телефон рақамимни ўзгартирмаганман. Мен машҳурликка етганимда телефонимда 10 мингта контакт бор эди ва бу одамларнинг ҳаммаси менга доим ёзарди мен эса уларнинг ҳар бирига жавоб ёзишга улгурмас эдим”, дейди мусиқачи.

Бу муаммони хонанда жиддий тарзда ҳал қилди: у умуман смартфондан воз кечди. У билан фақат электрон почта орқали боғланиш мумкин бўлиб қолди. Узоқ танаффусдан сўнг, 2023 йилда британиялик артист тармоққа қайтди. Ва ҳатто ўз шахсий аккаунтларини кузатмагани учун узр сўради. Эд мухлисларига янги постларни мунтазам равишда ёзишни ваъда қилди. Ҳозирча у ваъдаси устидан чиқяпти.

Зендая: бахтли бўлиш учун ижтимоий тармоқларни чеклади

Зендая ижтимоий тармоқлар унинг хавотирланиш даражасини оширишини тан олди. Актриса тармоққа дабдабали қайтишларни эълон қилмайди, фақат баъзида мухлисларни постлар билан хурсанд қилади. Кўпинча бу расмий суратлар бўлиб, экран ортидаги ҳаётни эфирга узатмайди. Шу билан бирга, у ўзи барча обуначиларини ўчирди. “Дюна” фильми юлдузи навбатдаги интервьюсида ўз хулқ-атворини тушунтирди: “Мен ҳар доим уятчан қиз бўлганман. Ижтимоий тармоқлар мени хавотирга солади ёки мен у ердаги ҳамма нарса ҳақида жуда кўп ўйлай бошлайман. Одатда мен кўп пост қўймайман ва мухлисларим бунинг учун мени ёмон кўришади”.

Актриса яна шуни таъкидлайдики, унинг саҳифалари шоу эмас, балки қулай бўлиши керак бўлган макондир. Ҳатто менежерларнинг ҳам уларга кириш ҳуқуқи йўқ. Мухлислар унинг ижтимоий тармоқлардаги камнамолигидан хафа бўлишлари мумкин, аммо Зендая учун сохта чиройли расмдан кўра ҳақиқий бахт афзал.

Кира Найтли: беш дақиқага очилиб, ўчирилган аккаунт

Кира Найтли ҳам ижтимоий тармоқлардан узоқроқ бўлишни афзал кўрадиган юлдузлардан бири. Актриса интервьюларининг бирида тан олди: бир марта у “ижтимоий тармоқлар қандай ишлашини кўриш учун” сохта исм билан аккаунт очишга қарор қилган. Аммо беш дақиқадан кейин уни ўчириб ташлаган.

Сабаби эса ҳаддан зиёд эътиборда эди, у ҳатто шахсини ошкор қилмаган бўлса ҳам, обуначилар даҳшатли тезликда пайдо бўла бошлади. Бу тажриба унинг ижтимоий тармоқлар хавотирланиш даражасини ошириши ҳақидаги фикрини мустаҳкамлади. “Мен ҳаётимнинг ҳеч ким билан бўлишиш шарт бўлмаган қисмларини кўпроқ қадрлайман”, деб тушунтиради актриса. Шундан сўнг Кира жимгина офлайн бўлишни танлади.

Интернет миллионлаб обуначиларни тақдим этиши мумкин, аммо улар билан бирга хавотирланиш, чарчоқ ва шахсий чегараларни бузиш ҳам келади. Юлдузлар, бизнинг ҳаммамиз сингари, оммавийлик ва ички хотиржамлик ўртасида мувозанатни излашади. Ва кўпчилик учун офлайнни танлаш — бу инжиқлик эмас, балки ўзини сақлаб қолиш усулидир.