Голливуд юлдузлари учун фотосессиялар бу шунчаки иш эмас, балки образнинг бир қисмидир. Кимлардир реклама учун суратга тушади, бошқалар эса жиддий муаммоларга жамоатчилик эътиборини қаратиш ёки шахсий ҳикоясини етказиш учун фотосессия уюштиради. Юлдузнинг обрўси қанчалик баланд бўлса, фотосессия нархи ҳам шунчалик қиммат. Ушбу мақолада энг ёрқин, энг ноодатий ва, эҳтимол, энг қимматга тушган машҳур фотосессиялар ҳақида ҳикоя қилинади.
Анжелина Жоли: суратларда экологик муаммолар
Актриса одатда фарзандларини оммавий ахборот воситаларининг эътиборидан узоқ тутишга ҳаракат қилади, аммо 2015 йилда Vogue журнали учун оилавий фотосессияга розилик берган.
Суратларда Жоли, Бред Питт ва уларнинг олти фарзанди денгиз бўйида тасвирга тушган. Фотосессияни Жон Леннон, Деми Мур, Мерил Стрип ва бошқа машҳурларни суратга олган фотограф Энни Лейбовиц олиб борган.
2021 йилда эса Анжелина National Geographic канали учун асалари билан суратга тушди. Кадрда унинг юзлари ва танаси тирик асаларилар билан қопланади. Суратга олиш 18 дақиқа давом этган, аммо унга узоқ тайёргарлик кўрилган. Фотоссесия катта маблағ ва жамоавий ишни талаб қилган. Мазкур лойиҳа асаларилар йўқолиб бораётганига эътибор қаратиш мақсадида ташкил этилган. Ғоя фотограф-асаларичи Ден Уинтерсга тегишлидир.
Леди Гага Примадонна образида
Леди Гаганинг ҳар бир фотосессияси катта маблағ ва креатив ёндашувни талаб қилади. 2019 йилда Гага V Magazine журнали учун 25 марта суратга тушди. Фотограф-рассом Жан Пол Гуд уни жонли ҳайкал — интерьер элементи сифатида тасвирлади:
“Биз Гагани жонли ҳайкалга айлантирмоқчи бўлдик”, деди Гуд фотосессия концепцияси ҳақида.
2024 йилда Леди Гага “Die with a smilе” қўшиғига промо суратга тушганида барчани яна ҳайратда қолдирди — бу сафар у ёш Алла Пугачёва қиёфасига кирди. Оловранг парик, оқ калта либос, кўк тен ҳақиқий Алла Борисовна образига ўхшаган эди.
Девид Бекҳэм: биргина кадр учун миллионлар
2025 йил февраль ойида 49 ёшли Девид янги Boss Оnе Bodywеar ички кийим коллекцияси рекламасида суратга тушди. 2000 йиллардаги ёритиш услуби, Aston Martin, қора костюм — ўша давр услубини очиб берди. У 2024 йилда Hugo Boss брендининг юзи бўлди ва бу ҳамкорлик компанияга ўнлаб миллион доллардан ортиқ маблағга тушди.
Бекҳэмнинг ўзи ҳам шахсий бренди имижи учун катта маблағ сарфлашга тайёр одам. Март ойида у ўзининг Eyewear by David Beckham қуёшдан сақловчи кўзойнаклар бренди фотосессияси учун саҳрога йўл олди ва ҳаво шари фонида суратга тушди.
Жаред Лето: сурат учун баландликка чиқиш
Жаред Лето нафақат рок-мусиқачи ва актёр, балки профессионал алпинист ҳамдир. Унинг Instagram саҳифасида тоғ чўққиларини забт этган кўплаб суратлари мавжуд. 2023 йилда эса у Empire State Building биносига рухсат билан чиққан биринчи инсон бўлди.Бинонинг баландлиги 381 метр бўлиб, 102 қаватдан иборат. Бу ерда суратга тушиш Летога анча қимматга тушган.
Изоҳ (0)