Баъзи актёр ва актрисаларнинг фарзандлари санъат оламига осонгина кириб келган бўлса-да, бу уларнинг муваффақияти фақат оилавий мерос эканини англатмайди. Кимдир ота-онасининг шон-шуҳрати соясида қолиб кетган бўлса, яна кимдир ўз меҳнати ва иқтидори билан кино оламида мустақил юлдузга айланган. Ушбу мақолада ўз меҳнати орқали кино соҳасида йўлини топган ёш актёр ва актрисалар ҳақида сўз юритамиз.
- Патрик Шварценеггер
Афсонавий актёр Арнольд Шварценеггер ва тележурналист Мария Шрайвернинг ўғли Патрик 1993 йил 18 сентябрда Лос Анжелесда туғилган. Унинг кино соҳасидаги дебюти 2006 йилда 10 ёшида, “Захирадагилар ўриндиғи” (Bench Warmers) спорт комедиясида бўлган. Бироқ ундан кейин Патрик узоқ вақт кинодан четда қолиб, таълим олди ва актёрлик курсларида ўқиди. Шу билан бирга, у моделлик фаолиятини ҳам олиб борди.
2010 йилларнинг бошларида у фақат кичик ролларга эга бўлган. Бироқ асосий ролини 2018 йилда “Тунги қуёш” (“Midnight Sun”) драмасида ижро этди, кейин эса “Чикаго бандаси” криминал ва жанговар фильмида иштирок этди. “Зинапоя” биографик детектив триллерида у бош қаҳрамоннинг ўғли Тодд Питерсон образини гавдалантирди.
Патрикнинг энг сўнгги ишлари орасида 2025 йил 16 февралда бошланган “Оқ нилуфаргул” (”White Lotus”) сериалининг учинчи мавсуми ҳам бор.
- Лили-Роуз Депп
Голливуднинг энг чиройли жуфтликларидан бири Жонни Депп ва Ванесса Парадининг қизи Лили-Роуз Мелоди Депп актриса ва модел сифатида танилган. Унинг кинодаги дебюти 2014 йилда Кевин Смитнинг “Фил тиши” (“Tusk”) комедик ҳоррор фильмида бўлган. У ерда Лили иккинчи даражали рол ўйнаган бўлса-да, отаси Жонни Депп ва режиссёрнинг қизи Харли Квин Смит билан бирга ишлаш имкониятига эга бўлган. Кейинчалик унинг қаҳрамони “Ёга ихлосмандлари” (“Yoga Hosers”) фильмида асосий ролга айланган, аммо бу лойиҳа салбий баҳоланган.
Актрисалик билан параллел равишда Лили-Роуз модел сифатида Chanel ва Карл Лагерфелд билан ҳамкорлик қилган. “Раққоса” (“The Dancer”) ва “Вафоли ёр” (“A Faithful Man”) фильмларидаги иштироки унга “Сезар” мукофотига номзод бўлиш имкониятини берган.
Лили-Роузнинг муҳим ролларидан бири “Қирол” (“Тҳе Кинг”) фильмидаги Франция маликаси Кетрин Валуа образи бўлиб, бу фильмда Тимоти Шаламе билан жуфтлик образини ижро этган.
- Маргарет Куолли
1990 йилларнинг романтик комедиялар юлдузи Энди МакДауэлл ва собиқ модел Пол Куоллининг қизи Маргарет Куолли ҳам модел сифатида фаолиятини бошлаган, шунингдек, балет мактабида таҳсил олган.
Унинг кинематографиядаги илк иши “Пало Алто” драмасида бўлган. Кейинчалик “Яхши йигитлар” (“The Nice Guys”), “Сидней Ҳоллнинг йўқолиши” (“The vanishing of Sydney Hall”) ва “Фоссе/Вердон” сериалларида иштирок этган. Квентин Тарантинонинг “Бир вақтлар Голливудда” фильмида эса қисқа, аммо ёрқин образ яратган.
Шунингдек, у Ёргос Лантимоснинг “Бечоралар-бахтсизлар” ва “Меҳри-шафқат турлари” (“Kinds of kindness”) фильмларида ҳам иштирок этган. Энг катта ютуқларидан бири эса унга “Олтин глобус” номинациясини тақдим этган “Субстанция” фильмидир.
- Жек Куэйд
Жек Куэйд 1992 йил 24 апрелда Голливуд юлдузлари Мег Райан ва Дэннис Куэйд оиласида туғилган. Унинг илк кинодаги чиқиши 2012 йилда “Ҳаёт-мамот ўйинлари” (“The Hunger Games”) фильмида бўлиб, у ерда Marvel исмли трибунни ўйнаган.
У 2016 йилда Мартин Скорсезенинг “Винил” сериалида, кейинчалик эса Стивен Содербергнинг “Омадли Logan” (“Logan Lucky”) фильмида суратга тушган.
Аммо унга ҳақиқий машҳурлик “Йигитлар” (“The Boys) сериали орқали келган, у ерда асосий персонажлардан бири — Ҳью Кемпбелл ролини ижро этган. Шунингдек, у “Ўргимчак-одам: Ўргимчаклар олами бўйлаб” (“Spider-Man: Across the Spider-Verse”) анимацияларида овоз берган.
- Майя Хоук
Ума Турман ва Итан Хоукнинг қизи Майа Рей Турман Хоук дислексия билан яшайди, яъни ўқиш ва ёзишда муаммоларга дуч келади. Бироқ хасталик уни санъат соҳасида ривожланишдан тўхтатмаган.
Унинг илк йирик иши BBC томонидан суратга олинган “Кичкина аёллар” (“Little Women”) сериалидаги Жо Марч роли бўлган. 2019 йилда эса “Жуда ғалати ишлар” (“Stranger Things”) сериалининг учинчи мавсумида Робин Бакли образини гавдалантириб, катта муваффақият қозонган.
2023 йилда Майа бир нечта фильмда рол ўйнаган, жумладан, онаси Ума Турман билан “Қотиллик хонаси” (“The Kill Room”) фильмида иштирок этган. “Maestro” номли биографик фильмида эса Леонард Бернстайннинг қизини ижро этган.
Бундан ташқари, у мусиқий фаолият билан ҳам шуғулланади. Фолклор-рок жанрида қўшиқ куйлайди ва бугунги қадар учта альбом чиқарган.
- Рей Николсон
Машҳур актёр Жек Николсон ва актриса Ребекка Брусарнинг ўғли бўлган Рей Николсон ҳали ота-онаси каби катта муваффақиятларга эришмаган. Бироқ унинг карьерасида “Умид бағишловчи қиз” (“Promising Young Woman”), “Лакрицали питаса” (“Licorice Pizza”) ва “Кутилмаганда” (“Out of the blue”) каби фильмлар бор.
2024 йилда у “Табссум 2” (“Smile 2”) қўрқинчли фильмида рол ўйнаган. Режиссёр Паркер Финн уни отасига ҳурмат ифодаси сифатида таклиф қилганини айтган. Томошабинлар эса унинг жилмайишини Жек Николсоннинг “Порлаш” (“The Shining”) фильмидаги ифодаси билан солиштирган.
2025 йилда у Жек Куэйд билан “Новокаин” (“Novocaine”) жанговар фильмида иштирок этган. Шунингдек, 1 май куни намойиш этиладиган “Психопат билан бир кеча” (“Night with a Psycho”) фильмида ҳам асосий антагонистик ролни ижро этган.
Изоҳ (0)