Голливуд актёри Хю Грант ўзининг ижтимоий тармоқдаги саҳифасида “шармандали ва ҳақоратомуз” деб таърифлаган воқеа тафсилотлари билан бўлишди. Ҳодиса Лондоннинг Ҳитроу аэропортида содир бўлди, у ерда 63 ёшли актёр рафиқаси Анна ва беш нафар фарзанди билан сафардан қайтаётган эди. Ҳужжатларни текшириш жараёнида миграция хизмати ходимлари уни қўшимча текширув учун тўхтатишди.
Аэропорт ходими Грантнинг фарзандлари собиқ турмуш ўртоғидан экани ва уларнинг ўгай онаси билан бирга хорижга чиқишини шубҳали ҳисоблаб, унга бир нечта саволлар берди.
“Ҳозиргина Ҳитроудан рафиқам ва болаларим билан келдик. Ҳаммамизнинг паспортимизда фамилиямиз бир хил — Грант деб ёзилган. Миграция ходими болаларим билан суҳбатлашгач, уларга шивирлаб: булар ҳақиқатан сизларнинг онангиз ва отангизми, деб сўради. Улар ҳаддидан ошган кўринади, бу мен учун жуда ҳақоратли ва қўрқинчли ишдир” деб ёзди Хю Instagram саҳифасида.
Аммо қайд этиш жоизки, миграция ходими ўз ваколатлари доирасида ҳаракат қилган ва қонунчиликка хилоф ҳеч қандай иш қилмаган. Амалдаги қоидаларга кўра, агар бола вояга етмаган бўлса ва у билан сафарда бўлган катталар унинг ота-онаси эмаслиги ёки фамилияси бошқача эканлиги аниқланса, ходимлар бу каби саволларни беришга ҳақлидир. Бу чора болаларни ўғирлаш ёки ноқонуний тарзда чет элга олиб чиқилишининг олдини олиш мақсадида қўлланилади.
Изоҳ (0)