Ҳар бир ҳикоя қўрқинчли фильм учун тайёр сценарий бўлиши мумкин.
Антон Елчин
2016 йил 18 июнь куни 27 ёшли Елчин ўзининг Jeep Cherokee автомобилини қияликда қолдириб, почта қутисини текширгани кетади. Машина қияликдан пастга сирпаниб, уни устун ва дарвоза ўртасига қисиб қўйди. Антон жароҳатдан келиб чиққан асфиксия туфайли вафот этади. Айнан ўша пайтда Елчин эгалик қилган автомобиль модели узатмалар қутисининг нотўғри конструкцияси сабабли қайтариб олинаётганди. Бу конструкция “нейтрал” ҳолатни “тўхташ” ҳолати билан осонгина адаштириб юборишга олиб келарди. Елчинлар оиласи автоконцернни судга беради, кейинчалик эса суддан ташқари келишувга эришишади.
Айседора Дункан
1927 йил 14 сентябрда даҳшатли фожиа туфайли раққоса вафот этади. Узун ва енгил шарфларни севадиган Дункан кабриолетда сайр қилишга тайёрланаётган эди. У дўстлари билан хайрлашаётиб, бўйнига шарф ташлайди — шу нарса унинг ҳаётига зомин бўлади.
Автомобиль жойидан қўзғалиши билан шарф орқа ғилдирак ўқига ўралиб, уни машинадан улоқтириб юборади. Айседора бўғилиб, бир неча сония ичида жон беради.
Шармейн Максвелл
1990 йилларнинг машҳур Р&B гуруҳи Brownstone аъзоси 2015 йил 28 февралда ўғлининг футбол ўйинидан сўнг Лос Анжелесдаги уйига қайтиб, дам олиш мақсадида ўзига бир қадаҳ шароб қуяди. Кейин содир бўлган воқеанинг аниқ тафсилотлари номаълум, бироқ у қўлидаги шароб қадаҳи билан йиқилган ёки қадаҳни тушириб юбориб, сўнгра тасодифан синган шиша бўлаклари устига йиқилган бўлиши мумкин. Ҳар ҳолда, бу ҳодиса унинг бўйнида чуқур жароҳатга олиб келади. Жароҳат кучли қон йўқотишга сабаб бўлади. Эри уни касалхонага олиб боргунча, Максвеллнинг жони узилади. Ўшанда у атиги 46 ёшда эди.
Ная Ривера
2020 йил 8 июлда актриса Калифорниядаги Пиру кўлида чўмилаётганида чўкиб кетган. Риверанинг 4 ёшли ўғли Жози кейинчалик кўлда ижарага олинган қайиқда ёлғиз ҳолда топилади. Чўмилиш пайтида Rivera ва ўғли кучли оқимга дуч келгани, у эса ўғлини қайиққа чиқариш учун сўнгги кучини сарфлагани тахмин қилинган. Бироқ бу даҳшатли воқеанинг якуни эмасди. Яқинда Жозининг отаси Райан Дорси ўғли онасининг ўлимида ўзини айбдор ҳис қилаётганини маълум қилди. Сабаби онаси чўкаётганда бола унга арқон ташлай олмаган. Чунки арқонда катта ўргимчак бўлган — бола ҳашаротдан ўлгудай қўрққан.
Марта Мансфилд
Марта Мансфилд 1920 йиллар бошида Голливуд афсоналари (масалан, 1920 йиллардаги Доктор Жекилл ва жаноб Хайд” фильмида Жон Берримор) билан бирга суратга тушган, овосиз кинонинг гўзал ва ёш юлдузи эди.
1923 йил 29 ноябрда Мансфилд Техаснинг Сан Антонио шаҳрида “Виржиниялик Уорренлар” фильмида суратга тушаётганди. Танаффус пайтида у костюмини — кринолинли узун, нафис кўйлагини ечмай, дам олиш учун автомобилга ўтиради. Ўша йилларда чекиш жойлари ҳали унчалик чекланмагани сабабли, суратга олиш гуруҳи аъзоларидан бири ёқилган гугуртни ташлаганида, у тасодифан автомобилга тушади. Бир неча сония ичида Мансфилднинг енгил алангаланувчи кийими оловли шарга айланади. Ҳамкасби Уилфред Литeлл ёнғинни ўчириш учун устига палтосини ташлаб, уни қутқаришга жон-жаҳди билан ҳаракат қилади. Афсуски, актрисанинг бутун танаси оғир куйиш жароҳатини олади. Мансфилд касалхонага ётқизилади, аммо эртаси куни вафот этади. У атиги 24 ёшда эди.
Айтганча, унинг вафотидан сўнг “Виржиниялик Уорренлар” фильмидаги роли сезиларли даражада қисқартирилади, аммо қаҳрамони фильмда сақлаб қолинади.
Брендон Ли
Брендоннинг отаси Брюс Ли атиги 32 ёшида сирли вазиятда вафот этган (расмий маълумотларга кўра, ўлим сабаби оғриқ қолдирувчи дорига бўлган аллергик реакция натижасида келиб чиққан мия шиши деб ҳисобланган). Брендоннинг ўзи ҳам ёш кетди. Бу 1993 йилда “Қарға” фильмини суратга олиш чоғида юз беради. Унинг қаҳрамони отиб ўлдирилиши керак бўлган саҳнани тасвирга олишаётганди. Суратга олиш гуруҳининг кетма-кет хатолари туфайли актёрга бўш ўқ ўрнига ҳақиқий ўқ отилади. Ли яраланган пайтда камералар ишлаб турарди. У бор-йўғи 28 ёшда бу оламни тарк этади.
Борис Сагал
Кино ва телевидение режиссёри Борис Сагал 1971 йилдаги Чарлтон Хестон бош ролни ижро этган “Омега одам” фильми билан машҳур эди. 1981 йилда у вафот этади — бу лаҳза даҳшатли фильмнинг бир кўринишига ўхшаб кетади.
Сагал NBC’нинг “Учинчи жаҳон уруши” мини-сериалининг навбатдаги суратга олиш кунини эндигина якунлаганди. У вертолётдан тушгач, қандайдир тарзда айланаётган дум паррагига тўғри келиб қолади. Зарба унинг бошини бутунлай узиб ташлайди. Уни зудлик билан шифохонага етказишади, аммо қутқариб қолишнинг иложи бўлмайди.
У беш соатдан сўнг, 57 ёшида вафот этади. Унинг ўлими ҳолати кўпчиликни ҳайратда қолдиради. Мураккаб ва хавфли майдонларда ишлашга ўрганиб қолган тажрибали режиссёр қандай қилиб шундай қалтис хатога йўл қўйиши мумкин эди?
Шерон Тейт
Ўша пайтда Роман Поланскийнинг рафиқаси бўлган актриса Шерон Тейт ҳомиладорлигининг тўққизинчи ойида Менсон сектаси аъзолари томонидан ваҳшийларча ўлдирилган. Шерон боласи туғилгунча уни гаровга олишларини ва тирик қолдиришларини ёлвориб сўраган. Бироқ қотиллар уни шафқатсизларча қатл этишган. Унинг танасида 16 та пичоқ жароҳати аниқланган, улардан 5 таси ўлимга олиб келган.
Изоҳ (0)