Hamma mashhurlar ham o‘zlarining ijtimoiy tarmoqlarini yuritmaydi, chunki ularning har bir so‘zi va surati millionlab odamlar tomonidan muhokama qilinadi. Bu materialning qahramonlari onlayn hayotdan voz kechishdi. Nega ular bunday qildi va buni qilishga qanday muvaffaq bo‘lishdi, bu haqda bilib olasiz.
Ijtimoiy tarmoqlar har kungi hayotimizning bir qismiga aylanib qoldi, masalan, transportda keta turib lentani ko‘rib chiqamiz, nonushta paytida storislarni baham ko‘ramiz va yulduzlarni kuzatamiz, go‘yoki ular bizning tanishlarimizdek. Ammo mashhurlarning o‘zlari uchun bunday ochiqlik bosim, heyt va charchoqqa aylanadi. Kimdir tanaffus oladi, kimdir akkauntlarni jamoasiga topshiradi, kimdir esa umuman ijtimoiy tarmoqda o‘z sahifalarini ochmaydi. Oflayn hayotni tanlagan va buning muhimligini tushuntirgan yulduzlarning hikoyalari bilan tanishing.
Selena Gomes: ruhiy salomatlik layklardan muhimroq
Bittagina ijtimoiy tarmoqning o‘zida Selena Gomesga 421 million kishi obuna bo‘lgan. Shunga qaramay, yulduz ko‘pincha sahifalarni yuritishni rad etishini gapiradi. 2023-yilning noyabr oyida Selena bu qarorini dunyoda sodir bo‘layotgan dahshatli voqealar haqidagi xabarlar uning ruhiyatiga salbiy taʼsir ko‘rsatayotgani bilan izohladi. Boshqa bir safar esa xonanda ijtimoiy tarmoqlar ilovasini telefonidan o‘chirib tashlaganini va bundan keyin uni jamoa aʼzolari yuritishini aytdi. Bu kabi bayonotlarga muxlislar allaqachon o‘rganib qolishgan va ularni unchalik jiddiy qabul qilishmaydi.
-_etegEyx.avif)
Gomes ijtimoiy tarmoqlar uning holatiga salbiy taʼsir ko‘rsatishini tan oldi: xavotirlilikni kuchaytiradi, o‘z-o‘ziga bo‘lgan ishonchga zarar yetkazadi va haqiqat hissini yo‘qotadi. Tarmoqlardan tanaffuslar esa (garchi odatda uzoq bo‘lmasa-da) uning psixik salomatligini himoya qilishning bir usulidir.
“Men o‘z ijtimoiy tarmoqlarimda noadekvat foydalanuvchilar, heyterlar, g‘azabli sharhlar va haqoratlar bilan kurashishga majbur bo‘ldim. Bu kabi narsalarni eʼtiborsiz qoldirish qiyin. O‘zimni hurmat qilish va dunyoqarashimga putur yetmasligi uchun men kamroq postlar joylashtira boshladim. Hammaga shunday qilishni maslahat beraman”, deb tan oladi xonanda. Selena har safar tarmoqqa qaytib kelganida layklardan ko‘ra uning ruhiy salomatligi muhimligini eslatadi.
Bella Hadid: davolanish uchun ijtimoiy tarmoqlardan 100 kunga voz kechdi
2023-yilda dunyodagi eng mashhur modellardan biri Bella Hadid ijtimoiy tarmoqlardan yo‘qoldi. Uning muxlislari darhol xavotirga tushishdi. Ulardan biri hatto uning otasi, amerikalik milliarder Muhammad Hadid bilan bog‘lanishga muvaffaq bo‘ldi. Savollarga javoban modelning otasi Bella bilan hammasi yaxshi ekani va xavotirlanishga hojat yo‘qligini aytdi. Murojaatning skrinshoti darhol tarmoqda tarqaldi.
Ammo u ko‘rgazmalarda ham paydo bo‘lmadi, Met Gala va Kann kinofestivalini ham o‘tkazib yubordi. Keyinroq Bella o‘zining g‘oyib bo‘lishi sababini tushuntirdi: u Laym kasalligiga chalinib 100 kunlik davolanish kursini boshidan kechirganini aytdi. Bu kasallik qo‘ng‘iz chaqishi orqali yuqadigan yuqumli kasallik bo‘lib, kuchli charchoq, tanada og‘riq, teri muammolari va hatto psixoemotsional buzilishlarga olib keladi. Bunday paytda ijtimoiy tarmoqlar qo‘shimcha stressga aylanadi.
Deyarli yuz kun davomida u kameralar va gadjetlardan yiroqda bo‘lib, sog‘lig‘iga jiddiy eʼtibor qaratdi: “Menda hammasi yaxshi, xavotirlanishga hojat yo‘q. Men hech narsani o‘zgartirmasdim. Agar men bu yerga, hozirgi vaqtga, hammangiz bilan birga bo‘lgan bu lahzaga yetish uchun yana shu yo‘ldan o‘tishim kerak bo‘lsa, men buni yana qilardim”.
Hozir Bella yana faol, ammo u avvalgidek eʼtibor uchun kurashmaydi — sog‘lik va ichki xotirjamlik u uchun muhim.
Ed Shiran: 8 yilga ijtimoiy tarmoqlardan voz kechdi
Ed ijtimoiy tarmoqlardan voz kechish g‘oyasi 2015-yilda uning xayoliga kelganini aytadi. O‘shanda xonanda ularga qancha vaqt sarflayotganini angladi. Bundan tashqari, uni aybdorlik hissi qiynadi, chunki unga yozayotgan hammaga javob bera olmayotgan edi.
“15 yoshimdan beri telefon raqamimni o‘zgartirmaganman. Men mashhurlikka yetganimda telefonimda 10 mingta kontakt bor edi va bu odamlarning hammasi menga doim yozardi men esa ularning har biriga javob yozishga ulgurmas edim”, deydi musiqachi.
Bu muammoni xonanda jiddiy tarzda hal qildi: u umuman smartfondan voz kechdi. U bilan faqat elektron pochta orqali bog‘lanish mumkin bo‘lib qoldi. Uzoq tanaffusdan so‘ng, 2023-yilda britaniyalik artist tarmoqqa qaytdi. Va hatto o‘z shaxsiy akkauntlarini kuzatmagani uchun uzr so‘radi. Ed muxlislariga yangi postlarni muntazam ravishda yozishni vaʼda qildi. Hozircha u va’dasi ustidan chiqyapti.
Zendaya: baxtli bo‘lish uchun ijtimoiy tarmoqlarni chekladi
Zendaya ijtimoiy tarmoqlar uning xavotirlanish darajasini oshirishini tan oldi. Aktrisa tarmoqqa dabdabali qaytishlarni eʼlon qilmaydi, faqat baʼzida muxlislarni postlar bilan xursand qiladi. Ko‘pincha bu rasmiy suratlar bo‘lib, ekran ortidagi hayotni efirga uzatmaydi. Shu bilan birga, u o‘zi barcha obunachilarini o‘chirdi. “Dyuna” filmi yulduzi navbatdagi intervyusida o‘z xulq-atvorini tushuntirdi: “Men har doim uyatchan qiz bo‘lganman. Ijtimoiy tarmoqlar meni xavotirga soladi yoki men u yerdagi hamma narsa haqida juda ko‘p o‘ylay boshlayman. Odatda men ko‘p post qo‘ymayman va muxlislarim buning uchun meni yomon ko‘rishadi”.
Aktrisa yana shuni taʼkidlaydiki, uning sahifalari shou emas, balki qulay bo‘lishi kerak bo‘lgan makondir. Hatto menejerlarning ham ularga kirish huquqi yo‘q. Muxlislar uning ijtimoiy tarmoqlardagi kamnamoligidan xafa bo‘lishlari mumkin, ammo Zendaya uchun soxta chiroyli rasmdan ko‘ra haqiqiy baxt afzal.
Kira Naytli: besh daqiqaga ochilib, o‘chirilgan akkaunt
Kira Naytli ham ijtimoiy tarmoqlardan uzoqroq bo‘lishni afzal ko‘radigan yulduzlardan biri. Aktrisa intervyularining birida tan oldi: bir marta u “ijtimoiy tarmoqlar qanday ishlashini ko‘rish uchun” soxta ism bilan akkaunt ochishga qaror qilgan. Ammo besh daqiqadan keyin uni o‘chirib tashlagan.
Sababi esa haddan ziyod eʼtiborda edi, u hatto shaxsini oshkor qilmagan bo‘lsa ham, obunachilar dahshatli tezlikda paydo bo‘la boshladi. Bu tajriba uning ijtimoiy tarmoqlar xavotirlanish darajasini oshirishi haqidagi fikrini mustahkamladi. “Men hayotimning hech kim bilan bo‘lishish shart bo‘lmagan qismlarini ko‘proq qadrlayman”, deb tushuntiradi aktrisa. Shundan so‘ng Kira jimgina oflayn bo‘lishni tanladi.
Internet millionlab obunachilarni taqdim etishi mumkin, ammo ular bilan birga xavotirlanish, charchoq va shaxsiy chegaralarni buzish ham keladi. Yulduzlar, bizning hammamiz singari, ommaviylik va ichki xotirjamlik o‘rtasida muvozanatni izlashadi. Va ko‘pchilik uchun oflaynni tanlash — bu injiqlik emas, balki o‘zini saqlab qolish usulidir.
Izoh (0)