Агар сиз юлдузларнинг ҳаётини муаммосиз деб ўйласангиз, адашган бўласиз. Уларнинг ҳар бири дунё бўйлаб машҳурликка эришиш йўлида қийин босқичларни бошдан кечирган. Агар сиз ишончни қозонишни, ўзингизни севишни ва янги ютуқлар учун мотивацияни қандай топишни ўрганмоқчи бўлсангиз, унда машҳур Голливуд актёрларининг ушбу автобиографиялари сизга албатта ёқади. Қуйидаги ҳаётий ҳикояларга асосланган асарлар ҳар қандай романдан кўра қизиқарли. Бундан ташқари, улар илҳомланишга, ўзингизга ишонишга ва орзуларингизни амалга ошишига ёрдам беради.
Камерон Диас — “Инсон танаси ҳақида” китоби
Камерон Диас актрисалик фаолиятини тугатишга қарор қилганида ҳаммани ҳайратда қолдирди. Бироқ айнан шу даврда актриса “Инсон танаси ҳақида” китобини чиқарди. Камерон ушбу китобда инсон ўзини қандай севиши кераклиги, тана берган сигналларни тинглашни бошлаш ҳақида гапирган. Актриса ўзининг жисмоний ҳолати билан ишлаш орқали ўз карьерасида исталган чўққиларни забт этишига ва бахтли яшашига ишонч билдирган.
“Мен ўн беш йилдан бери ўз танасининг имкониятларини ўрганаётган аёлман ва мен учун бу тажриба энг ҳаяжонлиси ва фойдалисидир. Менда бор нарса, мен эришган ҳамма нарса қандайдир тарзда тана ҳақидаги билимларим билан боғлиқ. Мен ҳам катта ютуқларга эришишингизни истайман”, — дейди Диас.
“Бошқа бирор нарса” — Даян Китон
Даян Китон ҳақли равишда Голливуднинг энг нуфузли актрисаларидан бири деб ҳисоблаш мумкин. У Френцис Форд Коппола, Вуди Аллен ва бошқа таниқли режиссёрлар билан яқин дўст. У ўзининг таржимаи ҳолида нафақат кинодаги карьераси, балки шахсий ҳаёти ҳақида ҳам гапириб берган. Масалан, актриса ўз асарида ота-онаси билан қийин муносабатлари ҳақида ҳам ёзган.
“Шунчаки бахтли бўлинг” — Кейт Ҳадсон
Кейт Ҳадсон Камерон Диас каби саломатлик ва фитнеснинг аҳамиятига эътибор қаратишга қарор қилди. У ўз асарида иш ва уйдаги ҳаётини қандай қилиб уйғунлаштиришни ўргатади. Шунингдек, актриса орзунгиздаги танага эришишингизга ёрдам берадиган маслаҳатлар билан ўртоқлашди ва жараённинг ўзидан завқланишингизни эслатди.
“Ўзингиз билан ижобий муносабат ўрнатиш ўзингизни ҳурмат қилиш, камчиликларингизни қабул қилиш ва ўтмишингизни тан олишни англатади. Бу сизнинг кучли ва заиф томонларингизни қабул қилиш ва ўзингизни қулайроқ ҳис қилишга имкон яратади. Сиз ўзингизга ва қандай инсон эканингизга қарши курашмаслигингиз керак”, — дейди Ҳадсон.
“Мен бахтлиман” — Жеки Чан
Жеки Чан ушбу асарида ўтмиши ҳақида сўз юритган. У ўз таржимаи ҳолида шон-шуҳрат сари йўли ҳақида ёзган. Бу асарни мутолаа қилиш орқали сиз актёрнинг биринчи марта суратга олиш майдончасидаги ҳолатини, унинг қандай қилиб каскадёр сифатида ишлай бошлаганини ва кейинчалик Голливудни забт этишга қарор қилганини билиб оласиз.
Чан ўз асарида нафақат карьерасига эътибор қаратган, балки шахсий ҳаёти ҳақида ҳам сўз юритган. У китобда оиласи билан муносабатлари ҳақида гапириб, шон-шуҳрат ва унинг ҳаётига таъсири ҳақида гапирган. Ушбу китоб орқали сиз Жеки Чаннинг ўзингиз билмаган томонларини кашф этасиз.
“Яшил чироқ”, Меттю Макконахи
“Яшил чироқ” асари “Оскар” мукофоти совриндори Меттю Макконахига бутунлай бошқа томондан қарашга ёрдам беради.
“Ўттиз беш йил давомида ўзимни қизиқтирган ёки ҳаёт йўлида менга ёрдам берган нарсаларни тушундим, эсладим, тан олдим, тўпладим ва ёзиб олдим”, — дейди актёр.
Асарда Меттю кинодаги биринчи қадамлари, юридик факультетни тарк этиш тўғрисидаги қарори, отаси билан бўлган оғир муносабатлари, шахсий ҳаёти ва романтик ролдан кўра, буюк драматик актёр бўлишни истаган йигит ҳақида ёзган.
“Ҳаммасини эслаб қолинг” — Арнольд Шварценеггер
Арнольд Шварценеггер Австриянинг кичик шаҳарчасида туғилган. Актёр у ерда машҳурликка эриша олмаслигини тушуниб етади. Дастлаб у энг машҳур бодибилдерга айланди, кейинчалик фильмларда рол ўйнай бошлади, сўнгра эса Калифорния губернатори лавозимини эгаллади. Ушбу китобда актёр ҳаётининг барча муҳим босқичларини эслашга қарор қилган. Айнан шу хотиралар Netflix’нинг Арнольд ҳақидаги ҳужжатли сериали учун сценарий бўлди.
“Режали аёл: Бахтли ҳаёт қоидалари”, Мей Маск
Мей Маск биринчи мағлубиятдан кейин таслим бўладиган аёллардан эмас, у 31 ёшида ёлғиз онага айланди ва 60 ёшида у моделлик фаолиятини бошлади.
Бир вақтнинг ўзида супермодел, диетолог бўлиш, учта фарзандни дунёга келтириш ва дунёдаги энг таниқли бизнесмен — миллиардер ўғилни қандай тарбия қилиш керак? Мей Маск таржимаи ҳолида шу ҳақда сўз юритади. У Жанубий Африкада туғилган ва жуда кўп саёҳат қилган, кейин Канадага кўчиб ўтган ва муваффақиятли моделлик карьерасини қурган, косметика бўйича етакчи брендларнинг реклама роликларида ва Бейонсе клипларида суратга тушган.
Шу билан бирга, Мейнинг турмуши ҳавас қиларлик бўлмаган — автобиографиясида у бошидан кечирган кўплаб синовларни тасвирлайди. Шу билан бирга, у аёлларни илҳомлантирувчи маслаҳатлар беради, ўзингизга эътибор беришнинг муҳимлиги ҳақида гапиради ва янги иш бошлашга ҳеч қачон кеч бўлмаслигини эслатади.
Изоҳ (0)