Исроилнинг Ғазо секторидаги операциясида қатнашган аскарлар уларга қандай буйруқлар берилганини маълум қилди. Ҳарбийлар “Сукунатни бузиш” (Breaking the Silence) инсон ҳуқуқлари ташкилотига бу борада маълумот берди. Бу ҳақда TRT хабар берди.
Аскарлар сектор ҳудудларини “стерил зона”га айлантириш бўйича аниқ буйруқ олган. Унга кўра, кенглиги 1,5 километргача бўлган ҳудудда бино, экин ёки иссиқхона қолмаслиги керак бўлган. Гап “Нэтсарим йўлаги” ва Ғазонинг шарқий чегараси бўйлаб жойлашган ҳудудлар ҳақида кетмоқда.
Асосий вазифа — вайрон қилиш. Ҳаммасини текислаш керак, деган сержантлардан бири.
Breaking the Silence маълумотларига кўра, армия 3500 га яқин бино ва 35 фоизгача қишлоқ хўжалиги ерларини вайрон қилган, бу эса Ғазонинг озиқ-овқат хавфсизлигини жиддий таҳдид остига қўйган.
Ҳарбийлар бутун кварталларни оғир техникалар ва бульдозерлар билан буткул вайрон қилиш, қурбонлар жасадларини олиб чиқиш, ерларни миналаштириш ҳақида сўзлаб берган. Уйлар, фермер хўжаликлари ва иссиқхоналар вайрон қилинган. Операция ҳудудига яқинлашган ҳар қандай киши эҳтимолий хавф деб баҳоланган.
БМТ ва Amnesty International илгари бу каби ҳаракатларни ҳарбий жиноят деб эълон қилганди. Breaking the Silence ташкилоти бу ҳаракатлар фақат ҳимоя эмас, балки мажбуран кўчириш, вайрон қилиш ва мусодара қилиш эканини таъкидлаб, буни нормал ҳолат сифатида қарамасликка чақирмоқда.
Исроилнинг Ғазога ҳужумидан ҳарбийлар норози
Яҳудий давлати норозилик билдирган ҳаво кучларининг 1000 га яқин ходимини ишдан четлатиши мумкин. Гап захирадаги ва хизматда бўлган учувчилари, зобитлари ва аскарлари ҳақида кетмоқда. Улар Ғазодаги ҳарбий ҳаракатларга қарши чиқиб, урушни тугатишни талаб қилган хатга имзо чеккан.
Шундан сўнг Исроил ҳарбий-ҳаво кучлари раҳбарияти имзо эгалари билан шахсий суҳбатлар ўтказиб, уларни фикридан қайтишга чақирган. Қайсарлик қилиб туриб олганлар эса огоҳлантирилиб, ишдан бўшатилиши айтилган. Таҳдидлар сабаб фақат 25 нафар хизматчи фикридан қайтган, яна 8 нафари эса аксинча, рўйхатга қўшилиш истагини билдирган.
Изоҳ (0)