Исроил ва ҲАМАС 15 ойлик урушдан сўнг АҚШ ва Қатар воситачилигида ўт очишни тўхтатиш тўғрисидаги битимни имзолади. Бу ҳақда манабаларга таяниб, Axios ва Жерусалем Пост хабар берди.
Битим ҲАМАС томонидан гаровга олинганларни босқичма-босқич озод қилишни ҳам назарда тутади. Исроил вазирлар маҳкамаси келишувни маъқуллаш бўйича овоз беришни 18 январга қолдирган. Бу маҳбусларни озод қилиш учун зарур.
“Шу муносабат билан битимнинг кучга кириши 19 январдан тахминан 20 январь куни тушга қолдирилади”, деди Исроил бош вазири Биньямин Нетаньяхунинг ёрдамчиси.
АҚШ Давлат котиби Энтони Блинкен эса битим Исроил ҳукумати йиғилиши қолдирилганига қарамай, режалаштирилган вақтда кучга киришини айтганди. Ҳужжат АҚШ, Қатар ва Миср воситачилигида имзоланган. Урушаётган томонлар ўртасида Доҳа ва Қоҳирада билвосита музокаралар олиб борилган.
Битимнинг биринчи босқичида ҲАМАС Исроил томонига 33 нафар гаровга олинганларни топширади, уларнинг аксарияти тирик деб тахмин қилинмоқда. Булар асосан аёллар, болалар, кексалар, беморлар ва ярадорлардир. Бунга жавобан Исроил юзлаб фаластинлик маҳбусларни қамоқдан озод қилади.
Келишув шартларига кўра, Исроил армияси Ғазо сектори ҳудудларининг аксарият қисмидан чиқиб кетади, фақатгина Ғазо сектори ва Миср ўртасидаги Филаделфия йўлагида, шунингдек, Фаластин эксклави ва Исроил чегарасидаги махсус буфер ҳудудида ҳарбий мавжудлигини сақлаб қолади. Ғазонинг тинч аҳолиси ўз уйларига, жумладан, жанглар туфайли энг кўп зарар кўрган шимолий ҳудудларга ҳам қайтиш имкониятига эга бўлади.
Ўн олтинчи куни битимнинг иккинчи босқичи бўйича музокаралар бошланади. Бу босқичда Исроилга гаровга олинган эркаклар ва ҳалок бўлган асирларнинг қолган жасадлари топширилиши мумкин. Байденнинг таъкидлашича, келишувнинг учинчи босқичи Ғазонинг урушдан кейинги тикланишига қаратилади.
16 январь куни Нетаньяху офиси ҲАМАСни сулҳни бузишга уринишда, янги талаблар қўйишда айблаганди.
“ҲАМАС келишувга эришишга тўсқинлик қилувчи инқирозни сўнгги лаҳзада келтириб чиқариб, битимдан воз кечмоқда. ҲАМАС сўнгги дақиқада босим ўтказиш мақсадида воситачилар ва Исроил билан келишилган аниқ шартлардан бош тортмоқда”, деган эди Нетаньяху идораси.
Фаластиннинг ҲАМАС гуруҳи бунга жавобан ўт очишни тўхтатиш тўғрисидаги битимга содиқлигини маълум қилганди. Маълумотни ҳаракатнинг юқори мартабали вакили Иззат ал-Рашик тасдиқлаган.
Исроил ҳукуматининг маълумотларига кўра, Ғазо секторида ҲАМАСнинг асирлигида 98 киши қолмоқда, уларнинг тўрт нафари 2014-2015 йилларда асирга олинган. Камида 34 киши ҳалок бўлган деб ҳисобланмоқда, уларнинг баъзилари 2023 йил 7 октябрда ўлдирилган.
Изоҳ (0)