Isroil harbiy havo kuchlari qo‘mondonligi 970 nafar xodimi, shu jumladan, uchuvchilarni qurolli kuchlar safidan bo‘shatish bilan tahdid qilmoqda. Mahalliy Haaretz nashrining xabar berishicha, bunga ularning G‘azo sektoridagi urushga qarshi bayonotni imzolagani sabab qilib ko‘rsatilgan.
Ma’lum qilinishicha, harbiy-havo kuchlarining zaxiradagi va xizmatda bo‘lgan uchuvchilari, zobitlari va askarlari G‘azodagi harbiy harakatlarga qarshi chiqib, urushni tugatishni talab qilgan xatga imzo chekishgan. Ular urush siyosiy manfaatlar yo‘lida olib borilayotganini ta’kidlagan.
Shundan so‘ng Isroil harbiy-havo kuchlari rahbariyati imzo egalari bilan shaxsiy suhbatlar o‘tkazib, ularni fikridan qaytishga chaqirgan. Qaysarlik qilib turib olganlar esa ogohlantirilib, ishdan bo‘shatilishi aytilgan. Tahdidlar sabab faqat 25 nafar xizmatchi fikridan qaytgan, yana 8 nafari esa aksincha, ro‘yxatga qo‘shilish istagini bildirgan.
Bayonot mualliflari orasida harbiy-havo kuchlarining yuqori martabali uchuvchilari ham bor. Ular G‘azodagi harbiy harakatlar Isroil xavfsizligiga emas, bosh vazir Binyamin Netanyaxuning siyosiy manfaatlariga xizmat qilmoqda, deya hisoblaydi.
Nashrning yozishicha, bir necha kun avval Isroil harbiy-havo kuchlari qo‘mondoni general-mayor Tomer Bar imzo egalarining ba’zilari bilan uchrashgan. Uchrashuvda zaxiradagi ofitserlar Barni tanqid qilib, bunday tahdidlar harbiylarning siyosiy fikr bildirish huquqini buzayotganini bildirgan.
Qayd etilishicha, 19-mart kuni ikki nafar harbiy-havo kuchlari va harbiy razvedka xizmatidan jami ikki kishi jang qilishdan bosh tortgani uchun armiyadan bo‘shatilgan.
Isroil tomoni mart oyi boshida e'lon qilgan to‘liq blokadadan buyon G‘azo sektoriga gumanitar yordam to‘xtagan. Oziq-ovqat zaxiralari tugab bormoqda.
Izoh (0)