Исроил бош вазири Биньямин Нетаньяху Дамашқдаги ўтиш даври ҳукуматидан жанубий вилоятларни демилитаризация қилишни, шунингдек, у ердаги друзлар жамоасига хавфсизлик кафолатларини беришни талаб қилди.
Нетаньяху, шунингдек, Сурия раҳбариятига алоқадор кучларнинг Исроил чегараларига яқинлашишига йўл қўймаслигини таъкидлади. Унинг фикрича, чегара хавфсизлиги Сурияда Исроил армияси таянч пунктларини муддатсиз сақлаб қолиш учун етарли асосдир.
Сиёсатчининг қайд этишича, яҳудий давлати “Суриядаги ҳукмрон Ҳайъат Таҳрир аш-Шом гуруҳига ёки янги Сурия армиясининг Дамашқдан жанубдаги ҳудудга киришига йўл қўймайди”.
Сурия жанубида, жумладан, Ал-Кунайтра, Дераа ва Ас-Сувайда вилоятларида тўлиқ демилитаризация ўтказилишини талаб қиламиз. Биз Сурия жанубидаги друзлар жамоасига ҳеч қандай таҳдидни қабул қилмаймиз, дея таъкидлади Нетаньяху.
Исроил мудофаа вазири Исраэл Кацнинг аниқлик киритишича, ҳозирда ҳукумат Сурия жанубида янги қоидаларни жорий этмоқда.
Исроил армияси душман кучларининг Сурия жанубидаги хавфсизлик зонасида мустаҳкамланишига йўл қўймайди ва ҳар қандай таҳдидга қарши ҳаракат қилади, дея қўшимча қилди Кац.
У Исроил “ушбу минтақадаги дўстона аҳоли пунктлари билан” алоқаларни мустаҳкамлашини ваъда қилди.
Суриянинг собиқ президенти Башар Асад 2024 йил декабрь ойида ҳокимиятни тарк этганидан сўнг, Нетаньяху мунтазам армия чегарадаги постларини тарк этгани сабабли 1974 йилги ажратиш келишуви барбод бўлганини эълон қилди. Бироқ Дамашқнинг янги ҳукмдорлари шартномани ҳақиқий деб ҳисобламоқда.
Исроилнинг минтақадаги ҳужуми Эрон қуролли кучлари ва “Ҳизбуллоҳ”нинг мавжудлиги билан боғлиқ эди. Дамашқ озод қилинганидан кейин, менимча, уларнинг у ерда бўлишига умуман асос йўқ, дейди Суриянинг ўтиш даври президенти Аҳмад аш-Шаръа.
Изоҳ (0)