Исроил президенти Исхак Герцог ҲАМАС билан ярашиш битимига ҳали эришилмаганини билдирди. Ушбу келишув эҳтимоли тобора ортиб бораётганига қарамай, Исроил ва ҲАМАС расмийлари ўртасидаги музокаралар ҳали бирор-бир сезиларли натижага эришмаган.
Ҳозирда Исроил делегацияси Қатарда ҲАМАСнинг келишув тафсилотлари бўйича жавобини кутаётгани маълум, бироқ Ynet нашри манбасининг хабар беришича, ҳозирча ижобий жавоб эҳтимоли паст кўринмоқда.
Шунингдек, Герцог Ғазода 444 кундан бери асосий инсонпарварлик ёрдами, дори-дармонлар ва Қизил Хоч вакиллари ташрифисиз асирликда сақланаётган 100 га яқин гаровга олинганлар ҳақида эслатиб ўтган.
Al Jazeera нашри аввалроқ Исроил қўшинлари Ғазо шимолида жойлашган “Камол Адвон” касалхонасига камикадзе роботлари билан ҳужум қилгани ҳақида хабар берганди.
Бу Исроил армияси (САХАЛ) томонидан Фаластин анклавида бундай қурилмаларни қўллашнинг биринчи ҳолатидир. Яҳудий армияси шифохонани ўққа тутишда танклардан ва зарба беришда дронлардан фойдаланмоқда. Тиббиёт муассасасида 400 га яқин фуқаро, жумладан, чақалоқлар сақланмоқда.
Отишма туфайли тинч аҳолини эвакуация қилиш қийин. Шифохона директори Ҳусам Абу Сафиянинг айтишича, муассаса яқинида иккита жанговар робот портлаб, бинога зарар етказган ва 20 га яқин одам яраланган. Бундан ташқари, Дайр-ал-Балаҳ марказида гуманитар ёрдам колоннасига дрон ҳужуми қилган, оқибатда тўрт киши ҳалок бўлган. Бир кеча-кундуз ичида САХАЛ зарбаларида ҳалок бўлганлар сони 26 нафарга етган.
2023 йил 7 октябрь куни Фаластиннинг ҲАМАС ҳаракати Исроилга қилган ҳужумидан кейин Яқин Шарқдаги вазият кескинлашди. Бунга жавобан Исроил Фаластин анклавини қамал қилганини эълон қилди ва Ғазо, шунингдек, Ливан ва Сурияни ўққа тутди, қуруқликдаги операцияни бошлади. Исроил ва у билан боғлиқ кемаларга ҳам ҳусийлар зарба бермоқда.
Изоҳ (0)