7-октябр куни эрталаб HАMAS кучлари Исроилга ҳужум бошлади. HАMAS аъзоларининг айтишича, “Ал-Ақса тўфони” операцияси давомида Исроил шаҳарларига беш мингта ракета учирилган, бир неча ўнлаб қуролли кучлар Исроилнинг Ғазо сектори билан чегарадош аҳоли пунктларига кириб борган. Исроил расмийлари мамлакатга икки мингдан ортиқ ракета келиб тушганини айтмоқда.
Фаластин раҳбари Маҳмуд Аббос Фаластин халқи “Исроил ҳужумларидан ўзини ҳимоя қилиш” ҳуқуқига эга эканини таъкидлади.
Фаластин маъмурияти соғлиқни сақлаш вазирлигининг маълум қилишича, Ғазо секторига қилинган ҳужумларда камида 198 киши ҳалок бўлган, 1 610 дан ортиқ киши жароҳатланган. Вазирлик аввалроқ Ғазо сектори шимолидаги касалхонага зарба берилганини маълум қилганди.
Исроил расмийларининг соат 17:00 даги маълумотларига кўра, HАMAS ҳужумида камида 100 нафар исроиллик ҳалок бўлган, камида 908 киши жароҳатланган. Қурбонлар орасида камида бир тиббиёт ходими бор. Расмийлар қурбонлар сони ортишини айтди.
HАMAS кучлари 50 га яқин исроиллик аскар асирга олганини маълум қилди. Гаровга олинганлар Ғазо секторига етказилган. Ижтимоий тармоқларда қуролланган одамлар тинч аҳолини, жумладан аёллар ва кексаларни, шунингдек шикастланган танк экипажини мажбуран олиб кетаётгани акс этган видеолар пайдо бўлди (уларнинг ҳақиқийлиги тасдиқланмаган).
Шунингдек, HАMAS Ғазо сектори мудофаасига масъул бўлган исроиллик генерал майор Нимрод Алонийни гаровга олгани маълум қилинди. HАMAS аъзоларининг айтишича, гаровга олинганлар орасида Исроил армияси зобитлари ҳам бор. Al-Arabiya телеканали хабар беришича, Исроил ва Фаластин фракциялари вакиллари гаровга олинганларнинг тақдири бўйича музокараларни бошлаган. Исроил армияси HАMAS бир неча тинч аҳоли ва ҳарбий хизматчиларни гаровга олганини тасдиқлади. HАMAS операциясига қўшилган Фаластин Исломий Жиҳод ташкилоти гаровга олинганлар “Исроил қамоқларидаги барча маҳбусларимиз озод қилинмагунча ушлаб турилади” деб баёнот берди.
Исроил бош вазири Биньямин Нетаньяху мамлакат уруш ҳолатида эканини айтди. Исроил президенти Исхак Герцог HАMAS ҳужуми ортида Эрон расмийлари турганини даъво қилди. Исроил ҳарбий-ҳаво кучлари қирувчилари Ғазо секторида HАMAS’нинг 21 та нишонига: 17 та ҳарбий объект ва тўртта қўмондонлик марказига зарба берди.
Исроилнинг жануби қисми полиция томонидан ўраб олинган, 20 дан ортиқ аҳоли пунктларида махсус кучлар ҳаракатланмоқда. Ғазо яқинидаги Нирим шаҳрида HАMAS’нинг тўққиз аъзоси ўлдирилгани айтилмоқда. Исроил Миллий хавфсизлик вазири Итамар Бен-Гвир мамлакат бўйлаб фавқулодда ҳолат эълон қилингани ва ҳуқуқ-тартибот кучлари учун кўнгиллиларни жалб қилиш бошланганини маълум қилди. Исроилнинг собиқ бош вазири Нафтали Беннет кўнгиллилар сафига қўшилди. 8-октябр куни мамлакатда мактаб ва боғчалар ёпилади. Европанинг йирик авиакомпаниялари Исроилга парвозларни бекор қилди ёки қисқартирди.
HАMAS’ни кимлар қўллаб-қувватлади, кимлар қоралади?
“Толибон” HАMAS’нинг Исроилдаги операцияларини қўллаб-қувватлади.
“Агар Исроилга қўшни мусулмон давлатлар бизга у ердан ўтиш ҳуқуқини берса, биз Қуддусни фатҳ қиламиз”, — деган “Толибон” расмийси.
Ливан ва Уммонда HАMAS’ни қўллаб-қувватловчи намойишлар бўлиб ўтди.
Саудия Арабистони кескинлашув ва тинчлик музокараларини зудлик билан тўхтатишга чақирди. Исроилга қарши бўлган Ливаннинг “Ҳизбуллоҳ” гуруҳи Ғазодаги вазиятни кузатаётганини ва “Фаластин қаршилик ҳаракати раҳбарияти” билан алоқада эканлигини маълум қилди. Россия можаро томонларини босиқликка чақирди. Эрон HАMAS жангариларини қўллаб-қувватлашини билдирди.
Айни пайтда дунёнинг кўплаб давлатлари, хусусан, Буюк Британия, Германия, Франция, Нидерландия ва Украина HАMAS’нинг Исроилга ҳужумини қораламоқда. Ушбу ҳаракатларни Европа комиссияси раҳбари Урсула фон дер Ляен ҳам қоралаган. Миср ва Туркия можаро томонларини босиқликка чақирди. АҚШнинг Исроилдаги элчихонаси вазиятни “яқиндан кузатаётганини” айтди. Пентагон Исроилни ўзини ҳимоя қилиш учун зарур бўлган барча нарсалар билан таъминлашини эълон қилди.
Изоҳ (0)