АҚШ Сенатида 20 ноябрь куни Исроилга қурол сотишни тўхтатиш бўйича овоз бериш жараёнлари бўлиб ўтиши кутилмоқда. Ташаббускорлардан бири демократлардан сенатор Берни Сандерс ҳисобланади. У Исроилни Қўшма Штатлар томонидан етказиб берилган бомбаларни тинч аҳолига қарши қўллашда айблаган.
“Уруш деярли бутунлай АҚШ қуроллари ва Америка солиқ тўловчиларининг 18 миллиард доллар маблағлари ҳисобига олиб борилди. Исроил АҚШ томонидан тақдим этилган 2000 фунтли (907 килограмм) бомбаларни одамлар гавжум маҳаллаларга ташлади, бир ҳовуч ҲАМАС жангчиларини йўқ қилиш учун юзлаб тинч аҳолини ўлдирди ва жангчиларни оддий инсонлардан фарқлаш учун кам ҳаракат қилди”, деган Сандерс ўз баёнотида.
Бироқ ҳар икки партиянинг яҳудий давлатига нисбатан кучли хайрихоҳлиги сабаб резолюциялар қабул қилиниши даргумон, деб ёзмоқда Reuters. Лекин тарафдорлар мазкур ташаббус Байден администрацияси ва Исроил ҳукуматини Ғазодаги тинч аҳолини ҳимоя қилиш учун кўпроқ чоралар кўришга ундайди, деган умидда.
Демократ сенаторлар Жефф Меркли, Питер Уэлч ва Брайан Счат ҳамкорлигида тақдим қилинган резолюцияларнинг иккитаси миномёт снарядлари ва JDAM авиабомбалари сотувини блоклайди. Учинчиси эса Меркава танклари учун ўқ-дорилар етказиб беришни чеклайди.
Ғазодаги вазият
Уруш сабабли гуманитар вазият ёмонлашган Ғазода икки миллиондан ортиқ аҳоли яшайди. Улар ўз уйларидан кўчирилган ва инсонпарварлик ёрдамисиз кун кечира олмайди. Халқаро ташкилотларга кўра, анклав ҳозир очарчилик хавфи остида. Исроилнинг Ғазога ҳужуми оқибатида қурбонлар сони 43 922 кишидан ошган.
Октябрь ойида Байден маъмурияти Исроилни Ғазога гуманитар ёрдам оқимини яхшилаши учун 30 кун борлиги, йўқса АҚШ ҳарбий кўмаги хавф остида қолиши ҳақида огоҳлантирган. Оқ уйнинг 12 ноябрь кунги хулосасида Исроил бу борада ўзгариш қилгани ва гуманитар юклар оқимига ортиқ тўсқинлик қилмаётганини билдирганди. Бироқ анклавда фаолият кўрсатаётган инсонпарварлик гуруҳлари буни инкор этмоқда.
АҚШ қонунлари Конгрессга норозилик резолюцияларини қабул қилиш орқали хорижий қурол савдосини тўхтатиш ҳуқуқини беради. Ўтмишда бундай резолюциялар амалдаги маъмурият учун ноқулай бўлган турли мунозараларни келтириб чиқарган ҳолатлар бўлган.
Изоҳ (0)