Исроил ва ҲАМАС ўртасидаги уруш оқибатида ҳозирга қадар 48 нафар журналист ва ОАВ ходими ҳалок бўлди. Бу ҳақда Журналистларни ҳимоя қилиш қўмитаси хабар берди.
Ташкилот маълумотларига кўра, ҳалок бўлганларнинг 43 нафари фаластинлик, тўрт нафари — яҳудий ва бир нафари — ливанлик. Яна тўққиз нафар журналист яраланган, уч нафари бедарак йўқолган, 13 нафар ОАВ ходими эса ҳибсда.
“Ғазодаги журналистлар катта хатарга дуч келмоқда, улар Исроилнинг қуруқликдаги ҳужуми вақтида, жумладан, авиазарбалар берилаётган, алоқа ва электр энергия узоқ вақт ўчиб қолаётган ҳолатда можарони ёритишга уринмоқда”, — дейилади хабарда.
Қўмитадагиларнинг таъкидлашича, журналистларнинг аксарияти урушнинг биринчи кунида ҳалок бўлган — олти нафар. 18-ноярда эса беш нафар ОАВ ходими ўлган.
Аввалроқ Фаластин соғлиқни сақлаш вазири Май ал-Кайла Исроилнинг Ғазо секторига берган зарбалари оқибатида камида 150 нафар тиббиёт ходими ҳалок бўлганини маълум қилганди.
Изоҳ (0)