Россия Сурия президенти Башар Асадга унинг режимини мухолифат жангариларидан қутқариш учун жиддий аралашиш ниятида эмаслигини маълум қилди.
Sky News Arabia суҳбатдошининг сўзларига кўра, Асадга Россиянинг аралашуви содир бўлса, бу чекланган бўлиши ҳақида маълум қилинган, чунки Москванинг энди “бошқа муҳим вазифалари” мавжуд. Bloomberg агентлигининг Кремлга яқин манбаси 2011 йилда режими деярли қулаган ва сўнгги 9 йилда Россия армияси туфайли омон қолган Асадни сақлаб қолиш учун Москванинг ҳеч қандай режаси йўқлигини тасдиқлаган.
“Асад армияси чекиниб, бирин-кетин шаҳарларни топшираётганини инобатга олсак, бундай қутқарув режаси пайдо бўлиши даргумон”, дейди манба.
6 декабрь куни “Ҳайъат Таҳрир ал-Шом” (ҲТШ) қуролли мухолифат кучлари Суриянинг йирик Хомс шаҳрига яқинлашди. Ўтган ҳафта охирида улар мамлакат шимолидаги Ҳалабни эгаллаб олишди, кейин эса 5 декабрь куни Ҳамани эгаллаш учун жанубга йўл олдилар. 6 декабрь куни Сурия демократик кучлари деб аталмиш курд бўлинмалари Суриянинг Дайр аз-Зор шаҳрига кириб, Ироқ билан чегара пунктларини назоратга олгани маълум бўлди.
“Асаднинг келажаги ҳеч қачон бугунгидек заиф кўринмаган ва ҳозирда Россия уни қутқаришга қодир эмас, ҳатто буни хоҳламаётгандек кўринади. Хомс қишлоқларининг аксарияти мухолифатни сўзсиз қўллаб-қувватламоқда ва бу тозалаш учун узоқ йўл бўлади”, деди Вашингтон Яқин Шарқ институтининг Сурия ва терроризм ҳамда экстремизмга қарши кураш дастурлари директори Чарльз Листер.
Суриядаги вазият
Исёнчиларнинг Ҳалаб провинцияси ғарбий қисмида ҳукумат кучларига қарши кенг кўламли ҳужуми 27 ноябрь куни бошланди. Икки кундан сўнг улар 2016 йилдан бери биринчи марта Ҳалаб шаҳрига кирди. Ҳужумга Суриядаги фуқаролар уруши даврида Асадга қарши чиққан “Ҳайъат Таҳрир ал-Шом” террорчилик ташкилоти бошчилик қилди.
30 ноябрь куни Сурия армияси Ҳалабдан “қўшинларни вақтинча олиб чиқиб кетиши”ни эълон қилди. Аммо Асад Сурия “дўстлари ва иттифоқчилари ёрдамида террорчиларни йўқ қилишга қодир”лигини ишонч билан таъкидлаб, терроризмни йўқ қилишни “минтақадаги барқарорлик ва хавфсизлик” гарови деб атади.
Сурия президенти Башар Асад мамлакатдаги вазият юзасидан Исроилдан ёрдам сўради. Мурожаат Асаднинг Европадаги ёрдамчиларидан бири орқали Исроил томонига етказилган. Ушбу сўровга яҳудий давлати танқидий жавоб берган. Жумладан, Исроил ҳукумати Суриядаги вазият уларни ташвишга солмаслигини айтиб, “аввало, Суриядан эронпараст кўнгиллиларни олиб ташлаш, сўнгра ёрдам сўраш керак”лигини маслаҳат берган.
Изоҳ (0)