Туркия президенти Ражаб Тоййиб Эрдўғон Суриядаги ҳукуматга қарши кучларнинг ҳужумини изоҳлар экан, “мухолифат юриши” бахтсиз ҳодисаларсиз давом этишига умид билдирди.
У Сурия президенти Башар Асадга музокара бошлашни таклиф қилганини, бироқ у бунга рози бўлмаганини таъкидлади.
“Биз Асадга қўнғироқ қилдик. Сурия келажагини биргаликда белгилашни таклиф қилдик. Афсуски, бу борада ижобий жавоб олмадик. Идлиб билан ҳаммаси аниқ, Ҳомс мухолифат қўлида, гап уларнинг Дамашққа юриши ҳақида кетмоқда. Минтақа оғир аҳволда”, деди Эрдўғон.
Туркия етакчиси июль ойида Анқара ва Дамашқ ўртасидаги муносабатларни нормаллаштириш масаласини муҳокама қилиш учун Россия президенти Владимир Путин ва Асадни Туркияга таклиф қилишга тайёрлигини билдирган эди. Мамлакатларнинг дипломатик алоқалари 2012 йилда, Сурияда фуқаролар уруши бошланганидан бир йил ўтиб узилган.
Сурия фракциялари коалицияси Сурия шимоли-ғарбида юришда давом этар экан, Туркия дипломатик босим ва ҳукуматга қарши кучларни қўллаб-қувватлаганликда айбловларга учради. Анқара исёнчилар фаолиятига алоқадорлигини рад этмоқда.
Ҳафта бошида бўлиб ўтган телефон суҳбатларида Путин Эрдўғонга “Анқаранинг минтақадаги мавжуд имкониятларидан фойдаланган ҳолда” Сурия бўйлаб тартиб ўрнатиш зарурлигини айтган эди.
Суриядаги вазият
Исёнчиларнинг Ҳалаб провинцияси ғарбий қисмида ҳукумат кучларига қарши кенг кўламли ҳужуми 27 ноябрь куни бошланди. Икки кундан сўнг улар 2016 йилдан бери биринчи марта Ҳалаб шаҳрига кирди. Ҳужумга Суриядаги фуқаролар уруши даврида Асадга қарши чиққан “Ҳаёт Таҳрир аш-Шам” террорчилик ташкилоти бошчилик қилди.
30 ноябрь куни Сурия армияси Ҳалабдан “қўшинларни вақтинча олиб чиқиб кетиши”ни эълон қилди. Аммо Асад Сурия “дўстлари ва иттифоқчилари ёрдамида террорчиларни йўқ қилишга қодир”лигини ишонч билан таъкидлаб, терроризмни йўқ қилишни “минтақадаги барқарорлик ва хавфсизлик” гарови деб атади.
Сурия президенти Башар Асад мамлакатдаги вазият юзасидан Исроилдан ёрдам сўради. Мурожаат Асаднинг Европадаги ёрдамчиларидан бири орқали Исроил томонига етказилган. Ушбу сўровга яҳудий давлати танқидий жавоб берган. Жумладан, Исроил ҳукумати Суриядаги вазият уларни ташвишга солмаслигини айтиб, “аввало Суриядан эронпараст кўнгиллиларни олиб ташлаш, сўнгра ёрдам сўраш” кераклигини маслаҳат берган.
Изоҳ (0)