Исроил ҳарбийларининг таъкидлашича, разведка маълумотлари ва суд-тиббиёт экспертизаси 21 февраль куни Исроилга қайтарилган Бибаснинг ўғиллари ҲАМАС таъкидлаганидек, Исроил ҳаво ҳужумларидан эмас, балки қасддан ўлдирилганини кўрсатган.
Биз атиги 10 ойлик чақалоқ Кфир Бибас ва унинг 4 ёшли акаси Ариэл 2023 йил ноябрь ойидаёқ Ғазода гаровда ушлаб турилганда террорчилар томонидан ваҳшийларча ўлдирилганини тасдиқлай оламиз, дейилади Исроил армияси матбуот котиби контр-адмирал Даниэль Ҳагарийнинг телемурожаатида.
Унинг таъкидлашича, “ҲАМАС болакайларга ўқ узмаган, уларни ўз қўллари билан ўлдирган”. Ҳагарий болаларнинг отаси — яқинда гаровдан озод қилинган Ярден Бибас билан гаплашганини қўшимча қилди.
Гаровга олинганлар ва бедарак йўқолганлар оилалари форуми баёнот бериб, болаларнинг ўлдирилишини ваҳшийлик деб атади.
Биз ҲАМАС томонидан ҳали бегуноҳ гўдаклар — Ариэл ва Кфир Бибасларнинг шафқатсиз ва ваҳшийларча ўлдирилганини тасдиқловчи даҳшатли маълумотлардан чуқур таъсирландик, дейилади гуруҳ баёнотида.
ҲАМАС 21 февраль куни биринчи марта гаровга олинганларнинг жасадларини Исроилга топширди.
Тахминларга кўра, бу жасадлар ҲАМАС ҳужуми вақтида 83 ёшда бўлган фаол ва журналист Одед Лифшицга ва Бибас оиласининг уч аъзоси — 32 ёшли Шири Бибас ва унинг ўғиллари, 4 ёшли Ариэл ва 10 ойлик Кфирга тегишли бўлган.
Бироқ Исроил ҳарбийларининг таъкидлашича, экспертиза фақат уч нафар ҳалок бўлган гаровга олинганларнинг шахсини тасдиқлаган. Армия ҲАМАС томонидан топширилган тўртта жасаддан бири гаровга олинган Шири Бибас эмас, балки номаълум шахсга тегишли эканини маълум қилди.
Бу ҲАМАС томонидан ўта шафқатсиз қоидабузарлик бўлиб, келишувга кўра у тўрт нафар ҳалок бўлган гаровга олинганларни қайтаришга мажбур. Биз ҲАМАСни Шири Бибас ва ўғирланганларнинг барчасини қайтаришга чақирамиз, деди Исроил армиясининг араб тилида сўзлашувчи вакили Авичаи Адраи.
Исроил ва ҲАМАС ўртасидаги келишув гаровга олинганларни озод қилиш ва қурбонларнинг жасадларини қатъий равишда олдиндан тасдиқланган рўйхатга мувофиқ қайтаришни назарда тутади.
Кфир ва Ариэлнинг онаси Ширини қайтариш ўрнига, ҲАМАС ҳеч нарсага арзимайдиган юк каби номаълум жасадни қайтарди. Бу янги тубанлик, ёвузлик ва шафқатсизлик бўлиб, бунга тенг келадигани йўқ, деди Исроилнинг БМТдаги доимий вакили Дэнни Данон.
ҲАМАС жасадларни оммавий намойишда топширганди. Бирлашган Миллатлар Ташкилоти бош котиби Антонио Гутерриш буни қаттиқ қоралади.
Изоҳ (0)