Ғазо секторидаги фаластинликлар Рамазон ҳайитини озиқ-овқат таъминоти камаяётгани ва Исроил ҳужумлари фонида қарши олди. Бу ҳақда Al Jazeera хабар берди.
Исроилнинг 30 март куни уюштирган авиаҳужумларида камида 20 нафар фаластинлик ҳалок бўлди, уларнинг аксарияти аёллар ва болалардир. Фаластинликлар Рамазон ҳайитини вайронага айланган масжидлар олдида кутиб олди.
Бу қайғу байрами. Яқинларимиздан, фарзандларимиздан, ҳаётимиздан, келажагимиздан айрилдик. Биз ўқувчиларимизни, мактабларимизни, муассасаларимизни йўқотдик. Биз ҳаммасини йўқотдик, дейди Адел ал-Шаэр ҳайит намозидан сўнг.
У Исроил ҳужумлари оқибатида катта оиласининг 20 аъзосидан айрилган, жумладан, бир неча кун олдин тўрт нафар ёш жиянлари ҳам оламдан ўтган.
Яҳудий давлати бош вазири Биньямин Нетаньяху урушни тугатиш бўйича музокараларга тайёр эканликларини айтмоқда. Аммо у ҲАМАСни қуролларни ташлаб, Ғазо секторини тарк этишга чақирмоқда. Шундан сўнг Исроил фаластинликларни “ихтиёрий кўчириш” режасини бошлайди.
Мазкур режа АҚШ президенти Дональд Трамп томонидан илгари сурилган. Сиёсатчи фаластинлик қочқинларни араб давлатларига кўчиришни таклиф қилганди. ҲАМАС ва араб давлатлари бунга жавобан ҳеч ким фаластинликларни ўз юртидан қувиб чиқаришга ҳақли эмаслигини қайд этган.
Ғазодаги уруш октябрь ойида ҲАМАС Исроилга ҳужум қилганида бошланди. 2023 йил 7 июлда 1200 га яқин одам, асосан тинч аҳоли ҳалок бўлди ва 251 киши гаровга олинди. ҲАМАС ҳамон 59 нафар гаровдагиларни ушлаб турибди, уларнинг 24 нафари тирик деб тахмин қилинмоқда.
Исроил ҳужумлари оқибатида 50 мингдан ортиқ фаластинлик ҳалок бўлди. Уларнинг аксарияти аёллар ва болалардир. Исроил 20 мингга яқин ҲАМАС жангчиларини ўлдирганини даъво қилмоқда.
Исроил Ғазо секторига ҳужумларни қайта тиклаган
Икки ой давом этган ўт очишни тўхтатиш бўйича келишувдан кейин, 18 мартга ўтар кечаси Исроил Ғазога авиазарбалар беришни тиклади. ҲАМАС нишонга олиниши айтилган ҳужумларда 400 дан ортиқ одам ҳалок бўлди, уларнинг аксарияти болалар ва аёллар ҳисобланади. Бундан ташқари, 560 дан ортиқ киши жароҳатланган. Ҳужумни қайта тиклаш буйруғи Исроил бош вазири Биньямин Нетаньяху ва мудофаа вазири Исроил Кац томонидан берилган.
Улар ўт очишни тўхтатиш режимини узайтириш бўйича музокараларда олдинга силжиш йўқлигига жавобан шундай қарор қабул қилганини айтган. Нетаньяху музокараларда олдинга силжиш йўқлиги учун айбни тўғридан тўғри ҲАМАСга юклаган.
Келишувнинг иккинчи босқичи Исроилдан ўз кучларини Ғазодан олиб чиқишни талаб қиларди. Ҳатто 19 январда кучга кирган ва Исроил қамоқхоналаридаги фаластинликлар эвазига гаровдагилар озод этилган биринчи босқичда ҳам Исроил Ғазода 150 дан ортиқ фаластинликни ўлдирди.
Исроил бош вазири Ғазодаги “барча кутилмаган қурбонлар” учун ҲАМАС жавобгар эканини даъво қилган. У Ғазода юзлаб одам ўлимига сабаб бўлган ҳужумлар “фақат бошланиши” эканини таъкидлаган. Бундан ташқари Исроил Ғазода қуруқликдаги операцияни қайта бошлаган. Яҳудий давлати Ғазо секторининг шимолий ва жанубий қисмлари ўртасида буфер зона яратмоқчи.
Изоҳ (0)