Ғазода ҲАМАС етакчиси Яҳё Синвар ўлдирилганидан сўнг унинг укаси Муҳаммад Синвар унинг ўрнига раҳбар бўлди, деб хабар бермоқда The Wall Street Journal.
Нашрга кўра, у ҳозирда гуруҳни қайта тиклаш устида иш олиб бормоқда.
Аниқланишича, 2024 йил октябрида Яҳё Синвар ўлдирилгач, Қатарда жойлашган ҲАМАС раҳбарлари жамоавий бошқарув кенгашини тузишга қарор қилишган. Бироқ газетанинг араб манбаларига кўра, Ғазо секторидаги гуруҳ жангчилари бу таклифни қабул қилмаган ва энди Муҳаммад Синвар раҳбарлигида мустақил ҳаракат қилмоқда.
WSJънинг араб амалдорлари билан суҳбатлашган мухбирларнинг қайд этишича, Исроил ҳарбий кучлари томонидан сезиларли даражада заифлаштирилган ҲАМАС янги жангчиларни ёллашни давом эттирмоқда. Бунда у жангчиларнинг оилаларига озиқ-овқат ва тиббий ёрдам ваъда қилмоқда. Ёлланган жангчилар бир неча кишидан иборат кичик гуруҳларда ҳужум қилиб, махсус ҳарбий тайёргарликни талаб қилмайдиган ўқотар ва танкка қарши қуроллардан фойдаланмоқда.
Исроил ҳарбийларига кўра, сўнгги бир неча ой ичида ҲАМАС асосан Ғазо секторининг шимолий қисмида юзлаб одамларни ўз сафига жалб қилган.
Муҳаммад Синвар тахминан 50 ёшда эканлиги айтилмоқда. У ҳам акаси сингари ёшлигидан гуруҳга қўшилган, аммо Яҳё Синвардан фарқли ўлароқ, Исроил қамоқхонасида бўлмаган ва “Исроил хавфсизлик хизматлари учун камроқ таниш шахс” ҳисобланади. Араб амалдорларининг сўзларига кўра, Муҳаммад Синвар асосан парда ортида фаолият юритган ва шу боис “соя” лақабини олган.
Ғазо секторидаги жангариларни Муҳаммад Синвар бошқараётгани ҳақида WSJ нашрида Исроилнинг истеъфодаги бригада генерали Амир Авиви ҳам маълумот берди. Унинг айтишича, ҳарбийлар ҲАМАСнинг янги раҳбарини топиш учун “барча куч-ғайратларини” сарфламоқда.
Яҳё Синвар Исроил қамоқхоналарида 20 йилдан ортиқ вақт ўтказган. У 1988 йилда қамоққа олиниб, 12 та қотиллик учун тўрт марта умрбод қамоқ жазосига ҳукм қилинган, бироқ 2011 йил октябрида беш йил олдин ўғирлаб кетилган Исроил аскари Гилад Шалитни озод қилиш бўйича келишув доирасида озод этилган. Исроил Муҳаммад Синварни Шалитни ўғирлашда айбдорлардан бири деб ҳисоблайди.
2024 йил августда Яҳё Синвар Теҳронда аввалги раҳбар Исмоил Ҳаниянинг ўлдирилишидан сўнг ҲАМАС сиёсий бюроси раҳбари бўлган эди. Бунга қадар Синвар, Ҳания сингари, узоқ вақт давомида Исроил ҳарбийларининг асосий нишонларидан бири бўлган - Исроилда уни ҲАМАСнинг 2023 йил 7 октябрдаги ҳужумининг бош ташкилотчиси деб аташган. 2024 йил 16 октябрда Исроилнинг Ғазо жанубидаги Рафаҳ шаҳрига ҳужуми чоғида Синварни бомбардимонда вайрон бўлган бинолардан бирида топишди ва у шу ерда ҳалок бўлди.
Яҳё Синвар ўлдирилганидан сўнг, Al-Jazeera телеканали унинг укаси Муҳаммадни унинг ўрнига бўлиши мумкин бўлган номзодлардан бири сифатида тилга олди. Бошқа номзодлар қаторида 1996 йилдан 2007 йилгача гуруҳнинг сиёсий қанотига раҳбарлик қилган Холид Машал ва ҲАМАС асосчилари орасида бўлган Мусо Абу Марзук ҳам бўлган.
Изоҳ (0)