Берлинда Исроил элчихонасига қарши теракт тайёрлаётган чеченистонлик қўлга олинди, деб хабар бермоқда Bild нашри.
Гумонланувчи — 18 ёшли чеченистонлик Аҳмад Э. Берлиндаги Исроил элчихонасига мактуб-бомба ёрдамида ҳужум уюштиришни режалаштирган. Агар бу режа амалга ошмаса, у пичоқ билан иложи борича кўпроқ одамни ўлдирмоқчи бўлган.
Бранденбург бош прокуратураси маълумотига кўра, йигит 20 февраль куни мамлакатни тарк этишга уринаётганда аэропортда қўлга олинган. Bild хабар қилишича, у Истанбулга учмоқчи бўлган.
Шу муносабат билан полиция Поцдамдаги кўп қаватли уйни эвакуация қилди. Махсус транспорт воситаси ёрдамида портловчи қурилма бўлиши мумкин бўлган шубҳали буюм олиб қўйилди.
Терговчилар нишон Берлиндаги Исроил дипломатик корпуси эканлигини билган, бироқ ҳужумнинг аниқ санаси ҳақида маълумотга эга бўлмаган. Америка разведкаси маълумотлари гумонланувчини аниқлашга ёрдам берган.
Bild’га маълум бўлишича, Аҳмад Э. агар портловчи мосламаси ишламаса, элчихона яқинида иложи борича кўпроқ одамни ўлдириш билан таҳдид қилган. Бундан ташқари, Аҳмад Э.нинг гумон қилинаётган шериги пичоқ зарбалари машқини бажараётгани акс этган видеоёзув ҳам мавжуд.
Гумонланувчининг яшаш манзилидаги мавжуд Wi-Fi тармоқлари рўйхатида Cassita de Terror (испан тилидан таржимаси: “кичкина террор уйи”) деб ёзилган. Ушбу тармоқни айнан ким яратгани номаълум.
Изоҳ (0)