Ливандаги “Ҳизбуллоҳ” етакчиси Ҳасан Насруллоҳ 3 ноябрь куни Исроил ва ҲАМАС борасида баёнот берди. У араб давлатларини Исроилга нефть экспортини тўхтатишга чақириб, “Ҳизбуллоҳ” ва Исроил ўртасидаги кенг кўламли уруш реал эканини айтди.
Насруллоҳнинг сўзларига кўра, операцияни бошлаш қарори юз фоиз ҲАМАС томонидан қабул қилинган, бу яширин тарзда амалга оширилган. “Ҳизбуллоҳ” мазкур режадан хабардор бўлмаган. Қуйида Ҳасан Насруллоҳнинг нутқидан муҳим баёнотларни келтириб ўтамиз:
Араб давлатларига мурожаат
“Ҳизбуллоҳ” раҳбари Ғазо секторида содир бўлаётган воқеалар шунчаки навбатдаги уруш эмас, балки ҳал қилувчи тарихий жанг эканини таъкидлади.
“Ғазо халқининг ғалабаси минтақадаги барча давлатлар, Миср, Иордания, Сурия ва Ливан миллий манфаатларининг ғалабасидир. Араб ва ислом давлатлари Ғазо халқига қарши тажовузни тўхтатиш учун барча саъй-ҳаракатларини амалга ошириши керак. Исроилга нефть ва газ етказиб бериш тўхтатилиши керак”, — деди Насруллоҳ.
ҲАМАС ҳужуми Фаластинни жаҳон саҳнасида эслашлари учун зарур эди
“Ғазода 2 миллиондан ортиқ одам 20 йилдан бери бўғувчи қамал остида яшамоқда, минглаб фаластинлик маҳбуслар узоқ йиллардан бери ишғол қамоқхоналарида сақланмоқда. Ҳеч ким ҳеч нарса қилмаяпти. Фаластин масаласи унутилганди ва энди у яна бутун дунёнинг диққат марказига айланди”
ҲАМАС Исроилга қарши ҳужумни ҳаммадан яширган
“ҲАМАС амалиёти юз фоиз фаластинликлар томонидан амалга оширилган. Мутлақ махфийлик 7 октябрь операциясининг муваффақиятини, Исроил армияси ҳамда разведкасининг муваффақиятсизлигини таъминлади. Амалиёт Исроилнинг заифлигини очиб берди, мамлакат фуқароларининг ўзлари Исроил заиф бўлиб қолганига ишонишди”
Ғазодаги ҳужумга АҚШ “айбдор”
“АҚШ Исроилга ҳомийлик қилганликда айбдор. Улар Ироқда, Вьетнамда ва Афғонистонда ҳам шундай ҳаракат қилишган. Америка қўллаб-қувватлашининг тезлиги ва кўлами ҳам Исроилнинг заиф эканини кўрсатади. Мамлакат жангнинг биринчи куниданоқ Америкадан қурол ва пул сўрай бошлади. Ғазо секторида содир бўлаётган воқеалар учун асосий масъулият АҚШ зиммасида ва айнан улар агрессияни тўхтатмаяпти”
Исроил Ливанга ҳужум қилса...
“Душман Ливанга ҳужум қилса, бутун мавжудлик тарихидаги энг катта аҳмоқликни амалга оширади. Бизнинг чегара операцияларимиз тўхтатувчи восита бўлиб, Исроилни стратегиясини тузатишга мажбур қилади. Ливан фронтида ҳозир содир бўлаётган воқеалар 2007 йил июль урушидан бери юз бермаган”
АҚШ Эронга “ҳужум қилмоқчи”
“АҚШ Эронни бомбардимон қилишга тайёрланаётгани ҳақида хабарлар олдик. Аммо таҳдидлар бизни қўрқитмайди — сизнинг ҳужумларингизга тайёрмиз. 1980 йиллар бошида сизни мағлуб этганлар ҳали ҳам тирик. АҚШ Ғазога қарши тажовузни тўхтата олади, чунки бу уларнинг тажовузи”,
“Ҳизбуллоҳ” Исроилга қарши урушга қўшиладими?
“Баъзи одамлар Исроилга қарши урушга қўшилишимиз кераклигини айтади. Аммо биз аллақачон урушдамиз. Биз 8 октябрдан бери урушдамиз”, — деди “Ҳизбуллоҳ” етакчиси Насруллоҳ
Шунингдек, у Ироқдаги исломий қаршиликнинг АҚШ базаларига ҳужум қилиш қарорини олқишлади. Насруллоҳ Америка халқларга қарши жиноятлари ва қирғинлари учун жавоб бериши кераклигини айтди.
У Ғазода сулҳга эришиш учун “кеча-кундуз ишлаш”га чақириб, бу “Ҳизбуллоҳ”нинг “асосий мақсади” эканини айтди. Эрон томонидан қўллаб-қувватланган Ливан гуруҳининг иккинчи мақсади: Ғазода ҲАМАС ғалабасидир.
Изоҳ (0)