“Исломий давлат” (ИШИД)нинг Хуросон бўлими ўзининг тарғибот платформасида бу йилги ҳужумлар учун потенциал нишонларни эълон қилди.
Нишонлар орасида Мюнхендаги Октоберфест, Венециядаги карнавал, Канндаги кинофестивал ва Венадаги опера бали қайд этилан. Террор таҳдиди бир неча кун олдин ИШИД-Хуросоннинг “Ал-Азоим Медиа” платформасида эълон қилинган.
ИШИДнинг мазкур бўлинмаси деярли 10 ой олдин Москвадаги Crocus City Hallъга уюштирилган террорчилик ҳужуми учун жавобгарликни ўз зиммасига олган эди. Бу ҳужум оқибатида 140 дан ортиқ одам ҳалок бўлган.
Германия давлат хавфсизлик хизмати ходими БИЛД нашрига таҳдидга нима учун жиддий муносабатда бўлиш кераклиги ҳақида шундай деди:
“Исроил билан давом этаётган можаро исломчилар орасида юқори даражадаги сафарбарликни таъминламоқда. Бундан ташқари, яқинда содир этилган терактлар автомобиль ёки пичоқнинг ўзи етарли эканлигини кўрсатди. Потенциал ҳужумчилар ҳам буни тушунишмоқда”.
Террорчи ташкилот яна жамоатчиликка мурожаат қилиб, йирик тадбирлар ва оммавий фестивалларни потенциал нишонлар сифатида тилга олиб, қўрқув ва ваҳима уруғини сочмоқчи.
2024 йилнинг сентябрида “Исломий давлат” террорчилик ташкилоти Ғазо секторидаги уруш фонида ўз тарафдорларини Европадаги яҳудийларга қарши ҳужумлар уюштиришга чақирган эди.
Ташкилотнинг ҳафталик “Европадаги жиҳод” журналидаги бош мақолада ташкилот ўзининг мусулмон тарафдорларидан Германия ва “бошқа салибчилар”да содир бўлгани каби кўпроқ ҳужумларни кутаётгани ёзилган. Мақолада яҳудийларни “қатл ва ўт қўйиш” орқали жазолаш ҳамда уларга зарар етказишга чақирилган.
Изоҳ (0)