БМТ Яқин Шарқдаги йирик уруш ҳақида огоҳлантирди

БМТ бош котиби Антониу Гутерриш Исроил армиясининг Байрутга ҳужуми ва ҲАМАС етакчиси Исмоил Ҳаниянинг Теҳронда ўлдирилганини танқид қилди.

Байрут жануби ва Теҳрондаги ҳужумлар барча саъй-ҳаракатлар Ғазода ўт очишни тўхтатиш ва Исроил-Ливан чегарасида тинчлик ўрнатишга йўналтирилиши керак бўлган бир пайтда хавфли кучайишдан далолат беради, деди унинг матбуот котиби Стефан Дюжаррик.

Унинг сўзларига кўра, Гутерриш манфаатдор томонларни “барча учун узоқ муддатли тинчлик ва барқарорлик ўрнатиш учун минтақадаги кескинликни юмшатиш учун фаол ҳаракат қилишга” чақирган.

Япониянинг БМТдаги доимий вакили ўринбосари Мицуко Шино Яқин Шарқда йирик ҳарбий можаронинг олдини олиш учун халқаро саъй-ҳаракатлар амалга оширилишини сўраган.

Биз минтақа кенг кўламли уруш ёқасида турганидан қўрқамиз, деди у.

Ўз навбатида, Хитойнинг БМТдаги доимий вакили Фу Сун Ғазода ўт очишни тўхтатиш келишувига эриша олмагани зиддиятнинг кучайишига сабаб бўлмоқда, деб ҳисоблаган. Унинг фикрича, кўпроқ таъсирга эга бўлган давлатлар кучлироқ босим ўтказиши ва Ғазодаги уруш алангасини ўчириш учун ҳаракат қилиши керак.

Британиянинг БМТдаги доимий вакили Барбара Вудворд Ғазода зудлик билан ўт очишни тўхтатишга, давлатларни вазминликка чақирган.

Тинчлик сари йўл дипломатик музокаралар орқали бўлиши керак. Узоқ муддатли тинчлик бомба ва ўқлардан келиб чиқмайди, дейди Вудворд.

Эроннинг БМТдаги доимий вакили Амир Саид Иравонийга кўра, Теҳрон доимий равишда максимал даражада вазминликни қўллаган, аммо қатъий жавоб бериш ҳуқуқини ўзида сақлаб қолади. У Хавфсизлик кенгашидан Исроилни қоралаб, уни санкциялар билан жазолашини сўраган.

Исроилнинг БМТдаги вакили ўринбосари Жонатан Миллер БМТ Хавфсизлик кенгашини Эронни минтақавий терроризмни қўллаб-қувватлаётгани учун қоралашга ва Теҳронга қарши санкцияларни кучайтиришга чақирган.