Исроил 2023 йил октябрь ойида Ғазога ҳужумлар бошлаганидан бери ҳалок бўлган фаластинликлар сони 50 мингдан ошди. Бу ҳақда Al Jazeera хабар берди.
Ғазо Соғлиқни сақлаш вазирлигига кўра, 7 октябрдан буён камида 50 021 фаластинлик ҳалок бўлган. Ярадорлар сони 113 274 кишини ташкил этмоқда. Исроил ҳарбийлари 23 март куни кечқурун Хон Юнусдаги Носир тиббиёт мажмуасидаги жарроҳлик биносига зарба берган. Ҳужум туфайли бошланган йирик ёнғин сабаб қурбонлар сони ортиши мумкин.
Исроил армияси ва разведка агентлиги ўз баёнотида ҳужумни тасдиқлаган. Улар одатдагидай шифохонада ҲАМАСнинг “асосий” аъзосини нишонга олганини даъво қилган.
Айтиб ўтиш жоизки, 50 минг — фақат тахминий кўрсаткич. Бу фақат Ғазо ҳудудидаги тиббий муассасаларда рўйхатга олинган одамлар сони. Рўйхатга олинмай дафн этилган ёки бедарак йўқолган, вайроналар остида қолиб кетган яна қанчадан қанча одамлар бор.
Ҳалок бўлганларнинг 17 минг нафари болалардир. Бутун бир авлод йўқ қилиб юборилди. Бу болалар ўз жамиятларининг сиёсий, иқтисодий ва интеллектуал жиҳатдан ривожланишига таъсир кўрсатган бўларди, деди Al Jazeera мухбири Ҳани Маҳмуд.
Ғазо медиа идорасига кўра, тасдиқланган қурбонлар сони бедарак йўқолган ва вафот этган деб тахмин қилинаётган 11 мингдан ортиқ кишини ўз ичига олмайди. 2024 йил июль ойида Lancet журналида чоп этилган тадқиқотда Исроил ҳужумлари туфайли қурбонлар сони 186 мингдан ортиши мумкинлиги прогноз қилинган.
Исроил ўзининг ҳужумлари ҲАМАС аъзоларига эҳтиёткорлик билан қаратилганини бир неча бор таъкидлаган, аммо ҳалок бўлган тинч аҳоли сони бошқа нарсани кўрсатади, дейди таҳлилчилар.
Исроил Ғазо секторига ҳужумларни қайта тиклаган
Икки ой давом этган ўт очишни тўхтатиш бўйича келишувдан кейин18 мартга ўтар кечаси Исроил Ғазога авиазарбалар беришни тиклади. ҲАМАС нишонга олиниши айтилган ҳужумларда 400 дан ортиқ одам ҳалок бўлди, уларнинг аксарияти болалар ва аёллар ҳисобланади. Бундан ташқари, 560 дан ортиқ киши жароҳатланган. Ҳужумни қайта тиклаш буйруғи Исроил бош вазири Биньямин Нетаньяху ва мудофаа вазири Исроил Кац томонидан берилган.
Улар ўт очишни тўхтатиш режимини узайтириш бўйича музокараларда олдинга силжиш йўқлигига жавобан шундай қарор қабул қилганини айтган. Нетаньяху музокараларда олдинга силжиш йўқлиги учун айбни тўғридан тўғри ҲАМАСга юклаган.
Келишувнинг иккинчи босқичи Исроилдан ўз кучларини Ғазодан олиб чиқишни талаб қиларди. Ҳатто 19 январда кучга кирган ва Исроил қамоқхоналаридаги фаластинликлар эвазига гаровдагилар озод этилган биринчи босқичда ҳам Исроил Ғазода 150 дан ортиқ фаластинликни ўлдирди.
Исроил бош вазири Ғазодаги “барча кутилмаган қурбонлар” учун ҲАМАС жавобгар эканини даъво қилган. У Ғазода юзлаб одам ўлимига сабаб бўлган ҳужумлар “фақат бошланиши” эканини таъкидлаган.
Изоҳ (0)