Исроил бош вазири Биньямин Нетаньяху 8 декабрь куни Сурия чегарасига борди ва президент Башар Асад режими Исроил туфайли қулаганини айтди. Бу ҳақда The Times of Israel хабар берди.
Нетаньяхунинг сўзларига кўра, Исроилнинг Эрон ва “Ҳизбуллоҳ”га қарши ҳужуми Суриядаги режимнинг ағдарилишига туртки бўлди.
Бу Яқин Шарқ тарихида тарихий кун. Ҳар қандай душман кучининг чегараларимизда қарор топишига йўл қўймаймиз. Асад режими Эрон “ёвузлик ўқи”нинг марказий бўғини ҳисобланади — бу режим қулади.
Бу Асад режимининг асосий тарафдорлари бўлган Эрон ва “Ҳизбуллоҳ”га берган зарбаларимизнинг бевосита натижасидир. Бу Яқин Шарқда бу зулм ва зўравонлик режимидан халос бўлишни истаганлар учун занжирли реакция уйғотди, деди Исроил бош вазири.
У мудофаа вазири Кац билан Сурия чегарасидаги Исроил армиясининг кузатув пунктини кўздан кечирди.
“Исроил у билан тинч-тотув яшашни истаган барча сурияликларга дўстлик қўлини чўзади, аммо душман кучларининг чегара яқинида мустаҳкамланишига йўл қўймайди”, деди Нетаньяху.
Шунингдек, у Ғазода гаровга олинганларнинг оилаларига Суриядаги ҳокимият алмашиши ўғирлаб кетилганлар озод этилишини тезлаштириши мумкинлигини маълум қилди.
Суриядаги вазият
Ноябрь ойи охирида қуролли исёнчилар Сурия шимолий қисмига юришни бошлади. Улар Идлиб вилоятини, мамлакатдаги аҳоли сони бўйича иккинчи ўринда турувчи Ҳалаб шаҳрини, Хама ва Хомс вилоятлари ҳудудларининг бир қисмини ўз назоратига олди. Шундан сўнг Дамашққа кирди. Президент Башар Асад оиласи билан мамлакатни тарк этгани ҳақида хабарлар тарқалди.
Кейинроқ Reuters нашри Асад бортида бўлган самолёт радарлардан йўқолгани, эҳтимол, уриб туширилган бўлиши мумкинлигини маълум қилди.
Россия Ташқи ишлар вазирлиги эса Башар Асад исёнчилар билан келишувга эришиб, истеъфога чиқишга рози бўлгани, шундан кейин Сурияни тарк этгани ҳақида маълумот берди. Ҳозирда Асад қаердалиги номаълум, унинг боши учун 10 миллион доллар ваъда қилинган.
Сиёсатчи мамлакатни тарк этганидан кейин исёнчилар Асад қароргоҳига бостириб кирган, одамлар буюмларни талон-тарож қилган. Қароргоҳдаги гаражда BMW, Audi, Ferrari, Lamborghini Diablo каби 50 га яқин ҳашаматли ва қимматбаҳо автомобиллар аниқланган.
Изоҳ (0)