Исроил мудофаа кучлари Ғазо секторининг марказий қисмидаги Ал-Мағози қочқинлар лагерига зарба берди, оқибатда 68 киши ҳалок бўлди, деб ёзди ҲАМАС ўзининг Telegram-каналида Фаластин Соғлиқни сақлаш вазирлигига таяниб.
The Times of Israel нашри ҳам Ал-Мағози ўққа тутилиши оқибатида 70 га яқин одам ҳалок бўлганини ёзди.
“Исроилнинг анклав маркази, Дайр ал-Балоҳ шарқидаги Ал-Мағози лагерига уюштирган ҳужуми оқибатида камида 70 киши ҳалок бўлди”, — дейилади нашр хабарида.
Агар ушбу маълумотлар тўғри бўлса, бу зарба Ғазодаги жорий ҳарбий амалиётлар ичида энг ҳалокатлиси, дея қўшимча қилган нашр.
ҲАМАСнинг “Ал-Қассам” ҳарбий қаноти маълум қилишича, сўнгги тўрт кун ичида 48 нафар исроиллик аскар ҳалок бўлган ва яна ўнлаб исроилликлар яраланган. ҲАМАС шунингдек, Исроилнинг 35 ҳарбий машинасини тўлиқ ёки қисман йўқ қилганини айтди.
Аввалроқ Исроил армияси 23 декабрда ҲАМАС билан кунбўйи давом этган тўқнашувларда тўққиз нафар, уруш бошланганидан бери жами 485 нафар Исроил ҳарбийси ҳалок бўлгани ҳақида хабар берганди
Сўнгги маълумотларга кўра, Исроилнинг 7 октябрдан бери Ғазо секторига берган зарбалари оқибатида ҳалок бўлган фаластинликлар сони 20 258 кишига етди, 53 688 киши жароҳат олди. Вайроналар остида яна минглаб жасадлар қолиб кетгани тахмин қилинмоқда.
Исроил ва Фаластин ўртасидаги узоқ муддатли можаро шу йилнинг 7 октябрида авж олди. Томонлар шу кунгача зарбалар алмашишда давом этмоқда. Ноябрь ойида Қатар Исроил ва ҲАМАС ўртасида тўрт кунлик сулҳга воситачилик қилганди.
24 ноябрь куни эрталаб ўт очиш тўхтади, шундан сўнг сулҳ икки марта узайтирилди — аввалига икки кунга, кейин яна бир кунга. 1 декабрь куни эрталаб унинг муддати тугади ва жанглар яна давом этди.
Изоҳ (0)