18 март куни Голливуддаги Шон-шуҳрат хиёбонида 2804-юлдуз очилишининг тантанали маросими бўлиб ўтди. Бу шарафга исроиллик актриса Гал Гадот лойиқ топилди. Унинг юлдузи энди 6840 Hollywood Boulevard манзилида, El Capitan театри олдида жойлашган.
Маросимда Вин Дизель, Палома Жименез ҳамда Гал Гадотнинг яқинлари ва қариндошлари иштирок этди.
Маросим ўтказилган жойнинг ёнида бир вақтнинг ўзида Исроилга қарши ва Исроилни қўллаб-қувватловчи акциялар ўтказилаётган эди.
Гал Гадот 1985 йилда Исроилнинг Рош-ҳайин шаҳрида туғилган. У Исроил мудофаа кучларида хизмат қилган. Гал Гадотнинг профессионал моделлик фаолияти 2004 йилда “Исроил гўзали” танловида ғолиб чиққанидан кейин бошланган. Ўша йили у Эквадорда ўтказилган “Дунё гўзали” танловида Исроилни ҳимоя қилган. Кейинчалик у йирик Исроил фирмаларининг реклама кампанияларида ишлаган. Гал Гадот ўзининг кинодаги биринчи ролини 2007 йилда “Бубот” (“Қўғирчоқлар”) Исроил сериалида ижро этган. Шундан кейин у Голливудда эътибор қозонди ва “Форсаж 4” фильмида ишлашга таклиф қилинди.
У “Форсаж”нинг тўртта қисмида рол ижро этди, кейин “Уч тўққиз” фильмида ўйнади ва “Бетмен ва Supermen: адолат тонги” фильмида “Мўжизакор аёл” ролини олди. Гал Гадотнинг кинодаги фаолияти орасида: 2017 йилда чиққан “Мўжизакор аёл” фильми, “Нилдаги қотиллик”, “Мўжизакор аёл 1984”, “Адолат лигаси”, “Уч тўққиз”, “Жиноятчи”, “Форсаж” франшизаси ва “Оппоғой” фильмлари бор. Актриса 2023 йил 7 октябрдан кейин Исроилни қўллаб-қувватловчи позицияси учун бир неча бор ҳужумларга учради. Гал Гадот энг кўп ҳақ тўланадиган Исроил моделлари қаторига киради. Аммо унинг актриса сифатидаги даромади моделлик бизнесидан олган даромадидан анча юқори. У бир неча марта “Оскар” маросимининг бошловчиси бўлган.
Изоҳ (0)